AQSh fond bozori 28-fevral, juma kuni, ochilganidan keyin kotirovkalarda keskin pasayish davom etdi. S&P 500’ning indeksi 3,09 foizni tashkil qildi, Dow Jones indeksi esa 3,52 foizga tushdi. Rossiyada bundan ham yomonroq holat qayd etilgan. Moskva birjasida pasayish 4,98 foizni tashkil qilmoqda, RTS dollar indeksi esa 6,5 foizga tushgan. Bu haqda The Bell xabar berdi.
Qayd etilishicha, agar AQSh birjalari indekslarining pasayishi shu sur’atda davom etsa, bozorning haftalik pasayishi 14 foizdan oshadi. Bu 2008-yildan beri AQShdagi eng yomon hafta bo‘ladi. G‘aznachilik obligatsiyalari bo‘yicha daromadlar navbatdagi tarixiy minimumga tushdi.
Bloomberg agentligining yozishicha, fond bozorida pasayish asosan koronavirus tarqalishining oldini olish choralari kompaniyalar va iqtisodiyotning o‘sishiga to‘sqinlik qiladi, degan qo‘rquvlar bilan bog‘liq.
Mavzuga doir: Koronavirus sababli jahon yalpi ichki mahsulotining yo‘qotishlari 1 trln dollarga yetishi mumkin
Bozorlardagi pasayish nafaqat AQShda, balki butun dunyoda kuzatilmoqda. Ba’zi birjalarda pasayish 10 foiz yoki undan ko‘proqqa teng bo‘lgan. Yevropadagi qimmatli qog‘ozlar qiymatining pasayishi 2019-yil avgust oyidagi darajaga yetgan. Stoxx Europe 600 birjasida indeks 3,5 foizga, Germaniyaning DAX birjasida esa 3,9 foizga tushdi.
Ma’lumot uchun, koronavirus tufayli dunyoning eng boy odamlari bir kunda 139 milliard dollar yo‘qotdi, O‘zbekistonning asosiy eksport mahsuloti — oltinning narxi rekord darajada ko‘tarildi. Samsung koronavirus bilan kasallangan xodim sababli Janubiy Koreyadagi korxonalaridan birini yopdi. Avvalroq milliarder Uorren Baffett koronavirusning tarqalishi va uning jahon bozoriga ta’siri haqida fikr bildirgan edi. Moody’s reyting agentligi virusning 2008—2010-yillardagi moliyaviy inqirozdan ko‘ra jiddiyroq oqibatlarga olib kelishi mumkinligi to‘g‘risida ogohlantirgan.
Izoh (0)