Хитойда коронавирус туфайли вафот этган одамнинг жасади ёриб текширилди ва касалликнинг асосан нафас йўлларига зиён келтириши аниқланди. Профессор Лиу Лиангнинг ҳисоботида бу ҳақда батафсил маълумот берилган, деб ёзмоқда Global Times.
Фото: Global Look Press
85 ёшли собиқ бемор январь ойида ишемик серебрал инсульт ташхиси билан шифохонага ётқизилган, 13 кун ўтиб унда коронавирус борлиги аниқланган, орадан яна 15 кун ўтгач эса вафот этган. Ёриб кўриш ишлари ўлимидан 12 соат ўтгач амалга оширилган.
Жараёнда коронавирус келтириб чиқарган касаллик ички нафас олиш органлари ва ўпка йўлларидаги алвеолаларга зарар келтириши аниқланди. Касалликнинг патологик ўзгаришлари SARS (оғир респиратор ўткир синдром, атипик пневмония) ва MERS (Яқин Шарқ респиратор синдроми) инфекцияларига ўхшаш экани, бироқ экссудатив реакция SARS’га нисбатан тезроқ кўзга ташланиши маълум бўлди.
Хитой соғлиқни сақлаш комиссиясининг маълумоти бўйича 28 февраль ҳолатига ХХРда 78,8 минг нафар одамда касалланиш ҳолати қайд этилган. Бутун дунёда коронавирус юқтириб олганлар сони эса 83,2 минг нафар, 2858 нафар одам касалликдан вафот этган. ЖССТ маълумотига кўра 82,2 минг одам коронавирусга чалинган. Хитой ҳукумати 36,1 минг нафар беморнинг касалликдан тузалганини хабар қилган.
Изоҳ (0)