Олий Мажлис Сенати Бюджет ва иқтисодий ислоҳотлар масалалари қўмитасининг 27 февраль куни навбатдаги мажлиси бўлиб ўтди. Йиғилишда қўмита аъзолари «Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонунни кўриб чиқди.
Тадбирда Қонунчилик палатаси кенгаши ҳамда Сенат кенгашининг 2019 йил 14 сентябрдаги қўшма қарори билан тасдиқланган «Тўйлар, оилавий тантаналар, маърака ва маросимларнинг ихчам ўтказилишини таъминлаш бўйича чора-тадбирлар дастури»га асосан тайёрланган қонун ҳам муҳокама қилинди.
Мажлисда «Дарё» мухбири Миролим Исажонов қўмита аъзолари, вазирлик ва идоралар вакилларига «Тўй ва маросимларни ўтказиш тартибига қўйиладиган умумий қонун талабларини бузган фуқароларга маъмурий жавобгарлик белгиланиши кўзда тутиляпти. Талабларга риоя қилмаган фуқаролар жаримани тўламай, маълум миқдордаги пулни МФЙ ходимлари ёки маҳалла инспекторига бериб, ҳолатни «ёпди-ёпди» қилишга уриниши ҳам мумкин. Бу эса жамиятда коррупция ҳолатини янада урчишига олиб келмайдими?», деган савол билан юзланди.
Саволга адлия вазири ўринбосари, Тошкент давлат юридик университети ректори Раҳим Ҳакимов шундай жавоб қайтарди:
«Бу масалада кўп ўрганишлар қилинди. Низомни ўқиган бўлсангиз, шундай талаблар қўйилганки, МФЙ ходимларини маросимдан аввал ҳам тўйхона, ҳам тўй ўтказувчи хабардор қилиши керак. Механизмлар яхши ёзилганки, коррупция эҳтимоли жуда кам. Сабаби тўй бутун жамоатчилик кўз ўнгида бўлади.
Қолаверса, одатда дабдабали, кўп исрофгарчиликка олиб келадиган тўйлар жамоатчилик орасида жуда шов-шув бўлиб кетади. Буни яширишнинг иложи йўқ. Бу кичкина нарса ёки цех эмаски, маҳалла инспектори бориб, уни ёпиб келса. Қолаверса, буларнинг исботи тўй ўтказувчининг қўлида бўлади. Чунки ҳаммаси камерага ёзилади. Ҳозир камерасиз тўй йўқ. Агар фуқаро дабдабали тўй қилган бўлса, тезда ҳамма ёққа тарқалиб кетади. Шунинг учун коррупциянинг урчиш эҳтимоли жуда кам», деди Раҳим Ҳакимов.
Изоҳ (0)