Mo‘g‘uliston prezidenti Xaltmaagiyn Battulga ma’muriyatining matbuot xizmati davlat rahbari Xitoy tashrifidan qaytgach, karantinga joylashtirilgani haqida OAVda tarqalgan xabarlarni tasdiqladi. Bu haqda “RIA Novosti” agentligi xabar bermoqda.
Mo‘g‘uliston prezidenti 27-fevral, payshanba kuni, Xitoyda tashrif bilan bo‘lib, Xitoy rahbari Si Szinpin va bosh vaziri Li Kesyan bilan muzokalar o‘tkazgan edi. Tashrifdan so‘ng OAVda prezident Battulga Mo‘g‘ulistonga qaytishi bilan 14 kunlik karantinga olingani haqida xabarlar tarqaldi.
“Prezident karantinga joylashtirilganini tasdiqlaymiz”, — deya ma’lum qildi Mo‘g‘uliston prezidenti matbuot xizmati.
Prezident ma’muriyati saytida e’lon qilingan axborotga ko‘ra, Xitoyga safar qilgan delegatsiya tarkibida tashqi ishlar vaziri, Mo‘g‘ulistonning Xitoydagi echlisi, Favqulodda vaziyatlar bo‘yicha milliy agentlik rahbari, prezident ma’muriyati rahbari, shuningdek, prezidentning tashqi siyosat bo‘yicha maslahatchisi bo‘lgan.
O‘tkazilgan uchrashuvlar vaqtida Mo‘g‘uliston prezidenti Xitoy tomoni epidemiyaga qarshi kurashda muvaffaqiyatga erishishiga ishonch bildirgan, shuningdek, Xitoy rahbari Si Szinpinga Mo‘g‘uliston xalqi nomidan sovg‘aga 30 ming qo‘y berilishi haqidagi sertifikatni topshirgan edi.
“U koronavirus epidemiyasining tarqalishidan mo‘g‘ul xalqi ham xavotirda ekanligi, chunki Mo‘g‘uliston va Xitoy o‘rtasidagi chegara 4700 kilometrni tashkil etishini ta’kidlab o‘tgandi”, — deyiladi xabarda. Battulga chegaradagi cheklovlar epidemiologik vaziyat bilan bog‘liqligi, keyin bekor qilinishini aytgandi.
Avvalroq Eron sog‘liqni saqlash vaziri o‘rinbosari va Eronning ayollar va oila masalalari bo‘yicha vitse-prezidenti koronavirus yuqtirib olgani, Eronning Vatikandagi sobiq elchisi esa koronavirus infeksiyasidan vafot etgani haqida xabar berilgan edi.
Izoh (0)