«Навбаҳор» клуби янги ўйинчилари тақдимотини ўтказди (фото)

Наманган шаҳридаги «Марказий» ўйингоҳида  «Навбаҳор» клубининг янги футболчиларни таништириш маросими ўтказилди. Бу ҳақда «Дарё» мухбири Азизбек Абдувалиев хабар бермоқда.

Тақдимот маросимини вилоят ҳокими, вилоят футбол ассоциацияси президенти Хайрулло Бозоров очиб берди. У ўз чиқишида бу йил Про-лигада ҳам Намангандан 2 та жамоа қатнашишини маълум қилди. Янги мавсумда «Навбаҳор» олдига юксак мақсад қўйилаётганлиги, 2020 йили «Навбаҳор» ўз тарихидаги иккинчи чемпионлик унвони ҳамда жорий йилда финал ўйини Намангандаги «Марказий» ўйингоҳда ўтказиладиган Ўзбекистон кубогини қўлга киритишига тилак билдирди.

Шунингдек, Хайрулло Бозоров жамоа таркибига янги  мавсум арафасида кўплаб маҳоратли футболчилар жалб этилгани, улар билан жамоа ўз олдига қўйилган мақсадига эришиш имконияти юқори эканлигини билдирди.

«Навбаҳор» жамоаси бош мураббийи Андрей Канчельскис янги мавсумга тайёргарлик жараёнидан қониққанлиги, бўлажак мавсумда жамоанинг олдига қўйилган мақсад йўлида самарали меҳнат қилишини таъкидлади.

Шундан сўнг жамоанинг янги аъзолари таништирилди.  Ҳимоячи Хуршид Мухторов, ярим ҳимоячи Ислом Исоқжонов, ҳужумчи Ҳусайн Эргашбоев, ярим ҳимоячи Жавлон Иброҳимов, дарвозабон Ислом Абдуллахонов, ярим ҳимоячи Ислом Рашидхонов,  ҳимоячи Тоҳир Шамситдинов, ҳужумчи Анвар Ҳожимирзаев, ярим ҳимоячи Сардор Теляков, ҳужумчилар Руслан Болов ва Забиҳилло Ўринбоев ҳамда ҳимоячи Шаҳзод Ҳамидов «Навбаҳор» футболкаларни қабул қилиб олди.

Мазкур маросимга фахрий меҳмон сифатида таклиф этилган  таниқли футбол шарҳловчиси Хайрулла Ҳамидов тадбир давомида йиғилганларнинг олқишига сабаб бўлган тилкларини билдириб ўтди.

— Жамоалар бор, раҳбарияти яхши, ўйинчилари кучли эмас. Баъзиларида бунинг акси. Айрим клубларда раҳбарият ҳам, футболчилар ҳам зўр, аммо ашаддий мухлислари йўқ. «Навбаҳор» раҳбарият, футболчилар, мураббий ва энг асосийси, мухлислардан ёлчиган. Энди фақат юксак марра — чемпионликка эришиш қолди, холос, — деди Хайрулла Ҳамидов.

«Навбаҳор» Puma билан 2020 йил учун ҳамкорлик келишуви имзолаган. Жамоа янги мавсумда қизил ва ҳаворанг либосларда майдонга тушади.

Маълумот учун, «Навбаҳор» янги мавсумдаги илк ўйинини 27 февраль куни Тошкентда, «Пахтакор» жамоасига қарши ўтказади.