Namangan shahridagi “Markaziy” o‘yingohida “Navbahor” klubining yangi futbolchilarni tanishtirish marosimi o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Taqdimot marosimini viloyat hokimi, viloyat futbol assotsiatsiyasi prezidenti Xayrullo Bozorov ochib berdi. U o‘z chiqishida bu yil Pro-ligada ham Namangandan 2 ta jamoa qatnashishini ma’lum qildi. Yangi mavsumda “Navbahor” oldiga yuksak maqsad qo‘yilayotganligi, 2020-yili “Navbahor” o‘z tarixidagi ikkinchi chempionlik unvoni hamda joriy yilda final o‘yini Namangandagi “Markaziy” o‘yingohda o‘tkaziladigan O‘zbekiston kubogini qo‘lga kiritishiga tilak bildirdi.
Shuningdek, Xayrullo Bozorov jamoa tarkibiga yangi mavsum arafasida ko‘plab mahoratli futbolchilar jalb etilgani, ular bilan jamoa o‘z oldiga qo‘yilgan maqsadiga erishish imkoniyati yuqori ekanligini bildirdi.
“Navbahor” jamoasi bosh murabbiyi Andrey Kanchelskis yangi mavsumga tayyorgarlik jarayonidan qoniqqanligi, bo‘lajak mavsumda jamoaning oldiga qo‘yilgan maqsad yo‘lida samarali mehnat qilishini ta’kidladi.
Shundan so‘ng jamoaning yangi a’zolari tanishtirildi. Himoyachi Xurshid Muxtorov, yarim himoyachi Islom Isoqjonov, hujumchi Husayn Ergashboyev, yarim himoyachi Javlon Ibrohimov, darvozabon Islom Abdullaxonov, yarim himoyachi Islom Rashidxonov, himoyachi Tohir Shamsitdinov, hujumchi Anvar Hojimirzayev, yarim himoyachi Sardor Telyakov, hujumchilar Ruslan Bolov va Zabihillo O‘rinboyev hamda himoyachi Shahzod Hamidov “Navbahor” futbolkalarni qabul qilib oldi.
Mazkur marosimga faxriy mehmon sifatida taklif etilgan taniqli futbol sharhlovchisi Xayrulla Hamidov tadbir davomida yig‘ilganlarning olqishiga sabab bo‘lgan tilklarini bildirib o‘tdi.
— Jamoalar bor, rahbariyati yaxshi, o‘yinchilari kuchli emas. Ba’zilarida buning aksi. Ayrim klublarda rahbariyat ham, futbolchilar ham zo‘r, ammo ashaddiy muxlislari yo‘q. “Navbahor” rahbariyat, futbolchilar, murabbiy va eng asosiysi, muxlislardan yolchigan. Endi faqat yuksak marra — chempionlikka erishish qoldi, xolos, — dedi Xayrulla Hamidov.
“Navbahor” Puma bilan 2020-yil uchun ҳamkorlik kelishuvi imzolagan. Jamoa yangi mavsumda qizil va havorang liboslarda maydonga tushadi.
Ma’lumot uchun, “Navbahor” yangi mavsumdagi ilk o‘yinini 27 fevral kuni Toshkentda, “Paxtakor” jamoasiga qarshi o‘tkazadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!