Avstriyada koronavirus yuqtirib olgan dastlabki ikki kishi aniqlandi

Avstriyaning Tirol federal shtatida koronavirus bilan zararlanish bo‘yicha dastlabki ikkita holat qayd etildi. Bu haqda “RBK” xabar berdi.

Ma’lum qilinishicha, hozirda Avstriyaning Insbruk shahrida istiqomat qiluvchi Lombardiyadan kelgan 24 yoshli ikki nafar italiyalik koronavirus bilan kasallangan. Ularning tana harorati ko‘tarilganidan keyin tibbiy yordamga murojaat qilgan.

Ularning ikkalasida ham koronavirusning mavjudligi ikkita tekshiruv natijasida tasdiqlangan. Hozirgi vaqtda bemorlar Insbruk klinikalaridan birida izolyatsiya qilingan. Klinikaning rahbari Frans Katsgraberning aytishicha, ayni paytda asosiy vazifa kasallar bilan aloqada bo‘lgan barcha odamlarni topish bo‘lib turibdi.

Bundan tashqari, Tirol gubernatori Gyunter Platter koronavirusga gumon qilingan odamlar uchun Insbrukda xususiy klinika ochish haqida topshiriq bergan.

Avstriyaning janubidagi Tirol federal yeri janubda Italiya bilan chegaradosh hisoblanadi.

Avvalroq Italiya poyezdlarining yo‘lovchilari koronavirusga tekshirilgandan keyingina Avstriya chegarasidan o‘tishga ruxsat berilayotgani haqida xabar berilgan edi.

Xitoy Sog‘liqni saqlash milliy komissiyasi mamlakatda o‘tgan bir sutka davomida COVID-19 koronavirusi oqibatida vafot etganlar 71 kishini (ularning aksariyati Xubey provinsiyasidan) tashkil etib, jami vafot etganlar soni 2663 kishiga yetganini ma’lum qildi. Qayd qilinishicha, Xitoyda 24-fevral, dushanba kuni, virusni yuqtirib olish bo‘yicha 508 ta holat aniqlangan, 2589 kishi davolanishga muvaffaq bo‘lgani aytilmoqda. Bugunga kelib, infeksiyadan jami 27 230 kishi davolangan, butun Xitoy bo‘ylab 641 ming odam tekshiruvlardan o‘tkazilgan bo‘lib, kasallikka chalinganlar 77 mingdan ortiq odamni tashkil qilmoqda.