Хитойнинг энг юқори қонун чиқарувчи органи — Бутунхитой халқ вакиллари кенгаши (БХХВК)нинг доимий қўмитаси душанба куни ҳар икки ойда бир марта ўтказиладиган навбатдаги сессиянинг очилишида коронавирус эпидемияси сабабли йиллик сессияни кейинга қолдириш ҳақида қарор қабул қилди. Бу ҳақда «РИА Новости» хабар бермоқда.

Фото: Reuters

БХХВКнинг йиллик сессияси — Хитойнинг асосий сиёсий ҳодисаси бўлиб, аввалги йилларда бўлгани каби 5 март куни очилиши керак эди. Тахминан 10 кун давом этадиган ушбу сессияда депутатлар мамлакатни ижтимоий-иқтисодий ривожлантириш режасини, бюджет лойиҳасини, ҳарбий бюджетни, шунингдек, бошқа қонун ҳужжатларини кўриб чиқади.

Аввалроқ БХХВК доимий қўмитасининг вакили Чжан Тянвей навбатдаги доимий сессияда ҳар йилги парламент сессиясини кейинга суриш тўғрисида қарор қабул қилинишини айтган.

БХХВКнинг қарийб 3 мингга яқин делегатлари, шу жумладан, провинция ва муниципал даражадаги юқори мартабали расмий шахслари айни пайтда ўз ҳудудларида короновирус эпидамиясига қарши кураш билан банд.

Хитой Конституцияси ва тегишли қонунларига кўра, йиллик сессияни кечиктириш тўғрисида қарор Бутунхитой халқ вакиллари кенгашининг доимий қўмитаси томонидан қабул қилинади.

Хитой Миллий соғлиқни сақлаш комиссияси маълумотларига кўра, Хитойда коронавирус инфекциясидан вафот этганлар сони бир суткада 150 кишига кўпайиб, қурбонларнинг умумий сони 2592 кишига етди.  Касалликдан даволаниб, шифохонани тарк этганлар сони эса 24 734 кишига етган. Шунингдек, коронавирус билан қайта касалланиш ҳолати кузатилди. Бундан ташқари, хитойлик олимлар коронавирус касаллик аломатлари пайдо бўлишидан икки кун аввал юқиши мумкинлигини ҳам аниқлади.

Мамлакатнинг олти провинциясида коронавирус сабаб жорий этилган фавқулодда вазиятга тезкор муносабат билдиришнинг энг юқори даражаси пасайтирилган. Улар орасида катталиги бўйича Хитойда иккинчи ўринда турадиган Гуандун ҳам бор.

Аввалроқ Жаҳон соғлиқни сақлаш ташкилоти Хитой коронавирусига қарши илк вакцина бир ярим йилдан сўнг пайдо бўлиши мумкинлигини маълум қилган эди. Февраль ойи ўрталарида эса Хитойда вирусга қарши курашда самарали бўлиши мумкин бўлган дори воситаси ишлаб чиқарила бошлангани айтилган эди.