Афғонистонда коронавирус инфекциясини юқтириш билан боғлиқ илк ҳолат қайд этилди. «РИА Новости»нинг ёзишича, бу ҳақда мамлакат соғлиқни сақлаш вазири Фирозуддин Фирузга таяниб 1TV News телеканали хабар берди.
Афғонистон Соғлиқни сақлаш вазирининг сўзларига кўра, 23 февраль куни Ҳирот вилоятида коронавирус инфекцияси аломатлари борлиги тахмин қилинган учта бемор рўйхатга олинган, текширувлар уларнинг бирида вирусни юқтириб олганини тасдиқлаган.
Қайд этилишича, соғлиқни сақлаш вазири Ҳиротда фавқулодда ҳолат эълон қилди.
Аввалроқ Tolo News телеканали Эроннинг Қум шаҳрида бўлиб қайтган уч афғонистонликда коронавирус юқтириб олганликда гумон қилинаётгани ҳақида хабар берган эди. Қум — Эрондаги коронавирус ўчоғи бўлиб турибди; Эронда 19 февралдан ҳозирга қадар коронавирусга чалинган 43 киши аниқланган, етти киши вафот этган.
Хитой Миллий соғлиқни сақлаш комиссияси маълумотига кўра, мамлакатда коронавируснинг умумий қурбонлари сони 2592 кишига етган. Эрон коронавирус қурбонлари сони бўйича Хитойдан сўнг иккинчи мамлакатга айланди. Арманистон Эронда коронавирус инфекцияси тарқала бошлагани муносабати билан ислом республикаси билан чегарасини ёпди ва ушбу мамлакат билан авиақатновларни икки ҳафтага тўхтатади.
Туркия ҳукумати ҳам худди шундай чоралар кўришини маълум қилган. Афғонистон ва Грузия Эрон билан авиақатновларни тўхтатган, Покистон эса худди Арманистон ва Туркия каби Эрон билан чегарани вақтинча ёпган.
Изоҳ (0)