2019-yilning iyul oyida Adliya vazirligi “Navoiy” erkin iqtisodiy zonasiga ingliz huquqini joriy etish rejalashtirilayotganini ma’lum qilgan edi, deb yozadi Spot.
O‘shanda vazirlik vakillari Britaniya ekspertlari bilan ushbu tajribani o‘rganish maqsadida muzokaralar olib borgan edi.
Qayd etilganidek, ingliz huquqi EIZ ishtirokchilarining harakatlarini huquqiy tartibga solish vositasi bo‘lib xizmat qiladi, shuningdek, “butun dunyo biznesi bu tizimga ishongani bois” u O‘zbekiston taraqqiyotiga ijobiy ta’sir ko‘rsatadi.
20-fevral kuni Xalqaro press klub sessiyasida ishtirok etgan adliya vaziri o‘rinbosari Akbar Toshqulov ingliz huquqini joriy etish jarayoni kamida 4—5 yil vaqt olishini aytib o‘tgan.
“Hozir muzokaralar, harakat mexanizmlarini ishlab chiqish jarayoni ketmoqda. Buni tezda amalga oshirish mumkin emas, chunki maxsus arbitrajni yaratish, bu sohada mutaxassislarni tayyorlash kabi qo‘shimcha tashkiliy masalalar mavjud”, — dedi adliya vazirining o‘rinbosari.
Ingliz huquqi asosan investitsiya nizolarni hal qilish uchun qo‘llaniladi, deydi Toshqulov. Buning uchun O‘zbekistonda ushbu tizimdan foydalanadigan institutlar tashkil etiladi.
Izoh (0)