Туркманистон пойтахти Ашхобод шаҳрида ўқитувчиларга яшил рангдаги блокнот ва ручкалардан фойдаланиш буюрилди, деб хабар берди «Хроники Туркменистана».
Қайд этилишича, пойтахтдаги 2, 4, 7-ўрта мактаб ўқитувчиларининг ҳар бири 45 манатдан (123 минг сўм) турадиган туркман гилами нусхаси туширилган яшил рангдаги ручкадан бештадан ва 50 манатлик (136 минг сўм) яшил блокнотдан сотиб олишга мажбурланмоқда.
Бир хил ручкалар ва блокнотлар ўқитувчилар мажлислар пайтида фойдаланиши учун зарурлиги айтилмоқда.
Бундай ручкалар Туркманистон буюртмасига кўра, Россия, Туркия ва Хитойда ишлаб чиқарилгани учун қиммат ҳисобланади.
Хабарда айтилишича, туркманистонлик амалдорлар ҳамда мамлакат кучишлатар тизими раҳбарлари президент билан учрашувда фақат яшил рангдаги блокнот ва ручкалардан фойдаланади.
Оқ ва яшил Туркманистон президенти Гурбангули Бердимуҳаммедовнинг севимли ранглари ҳисобланади.
Мамлакат раҳбарига яшил ўрамдаги гуллар берилади, у яшил спорт кийимларини кияди ва яшил велосипед минади.
Аввалроқ Туркманистонда 1 февралдан эътиборан давлат муассасалари ва корхоналарининг 40 ёшдан ошган эркак ходимларига сочларини қорага бўяш тақиқлангани ҳақида хабар берилган эди.
Изоҳ (0)