Чет элда вақтинча бўлиб турган ёки доимий истиқомат қилаётган Ўзбекистон фуқаролари учун қўшимча қулай шарт-шароитлар яратиш мақсадида Ўзбекистон Ташқи ишлар вазирлиги томонидан консуллик ҳисобидан онлайн ўтиш имконияти яратилди. Бу ҳақда Ўзбекистон Ташқи ишлар вазирлиги хабар берди.
Маълум қилинишича, 2020 йил 10 февралдан «Хорижда бўлган (бўлиб турган) Ўзбекистон Республикаси фуқаролари ва фуқаролиги бўлмаган шахсларнинг консуллик рўйхатини юритиш тартиби тўғрисидаги йўриқнома» кучга кирган.
Ушбу йўриқномага мувофиқ, чет элда бўлиб турган Ўзбекистон фуқаролари ва фуқаролиги бўлмаган шахслар Ўзбекистоннинг дипломатик ваколатхоналари ва консуллик муассасаларида доимий ёки вақтинча консуллик ҳисобидан ўтиш учун «consulate.mfa.uz» веб-портали орқали масофадан интерактив консуллик хизматидан фойдаланиши мумкин. Айни пайтда ушбу интернет-ресурс синов режимида ишга туширилган.
Вақтинчалик ва доимий консуллик ҳисобига олиш бўйича интерактив хизмат дастурий тизими техник синовдан ўтказилгандан кейин қисқа вақт ичида ўрнатилади ва йўлга қўйилади, дейилади ТИВ хабарида.
Доимий ёки вақтинча консуллик ҳисобидан ўтиш учун рўйхатдан ўтиш картасини тўлдириш керак. Консуллик ҳисобига олиш тўғрисида билдиришнома ариза берувчининг электрон манзилига юборилади.
Шунингдек, портал хорижга чиқиш паспортини, Ўзбекистонга қайтиш тўғрисидаги гувоҳномани, туғилганлик ёки ўлим тўғрисидаги гувоҳномани, фуқароликдан чиқиш учун ҳужжатларни ва бошқа онлайн-хизматларни тақдим этади.
Изоҳ (0)