Боёвут туманига аёл киши ҳоким этиб тайинланди

Бугун, 18 февраль куни, халқ депутатлари Боёвут тумани Кенгашининг навбатдан ташқари сессияси ўтказилиб, унда ташкилий масала кўрилмоқда.

Сирдарё вилояти ҳокимлиги ахборот хизматининг хабар беришича, унда депутатлар Улмасжон Мамадаминов бошқа ишга ўтаётганлиги муносабати билан Боёвут тумани ҳокими лавозимига Дилфуза Уралова Боёвут тумани ҳокими этиб тайинлаш тўғрисидаги вилоят ҳокимининг қарорини бир овоздан тасдиқлади.

Дилфуза Уралова 2012 йилда «Шуҳрат» медали билан тақдирланган. Халқ депутатлари Сирдарё вилояти Кенгаши депутати, Олий Мажлис Сенати аъзоси ҳисобланади.

1985—1990 йиллар мобайнида Гулистон давлат университети талабаси, 1990—2001 йилларда Сирдарё вилояти Мирзаобод тумани 10-умумий ўрта таълим мактаби ўқитувчиси, 2001—2010 йилларда  Сирдарё вилояти Мирзаобод тумани 10-умумий ўрта таълим мактаби директорининг маънавий-маърифий ишлар бўйича ўринбосари, директори бўлган.

2010—2015 йилларда  Сирдарё вилояти Мирзаобод тумани ҳокимининг ўринбосари, хотин-қизлар қўмитаси раиси лавозимида ишлаган. 2015—2017 йиллар мобайнида Олий Мажлис Қонунчилик палатаси депутати бўлган. 2017 йилдан шу кунга қадар Сирдарё вилояти ҳокимининг ўринбосари, хотин-қизлар қўмитаси раиси лавозимида ишлаб келган.

Оилали, 4 нафар фарзанди бор.

Боёвут туманига аёл киши ҳоким этиб тайинланиши муносабати билан Telegramдаги «Не молчи» канали Ўзбекистон тарихида аввал ҳоким бўлиб ишлаган 4 нафар аёл ҳақида эслатиб ўтди.

• Манзура Эгамова 1993 йилдан 2005 йилгача 12 йил давомида Андижон вилояти Жалақудуқ тумани ҳокими бўлган;
• Шакаржон Хўжаниёзова Хоразм вилояти Боғот тумани ҳокими бўлган;
• Раҳима Ҳакимова Самарқанд вилояти Самарқанд тумани ҳокими бўлган.
• Тоҳирахон Маризаева Наманган вилояти Косонсой туманида 1996 йилдан 2000 йилгача ҳоким вазифасида ишлаган.