General Motors Таиланддаги ўзининг автомобиль заводини Хитойнинг Great Wall Motor Co Ltd. компаниясига сотадиган бўлди. Бу ҳақда Америка компанияси томонидан 16 февраль куни тақдим этилган пресс-релизга таяниб, Spot хабар берди.
GM’нинг маълум қилишича, компания инвестициялар кутилган даромадни келтирмаётгани сабаб ўз стратегияси доирасида Австралия, Янги Зеландия ва Таиланд бозоридан чиқиб кетади.
Автомобиль ишлаб чиқарувчи 2021 йилда Австралия ва Янги Зеландиядаги Holden брендини ёпади, жорий йил охирига қадар эса Таиланддаги Rayong заводида савдолар бўйича битимларни тўхтатишни режалаштирмоқда.
General Motors бош директори Мэри Барранинг айтишича, компания кўпроқ даромад келтирадиган жойларга эътиборни кучайтириш ниятида.
Таъкидланишича, GM активларни топшириш ва ривожланаётган бозорларда харажатларни камайтириш учун кучли етказиб бериш тармоғини яратиш орқали Ўзбекистон каби бозорларда шериклик алоқаларини оптималлаштиришда давом этади.
Эслатиб ўтамиз, Таиланддаги Rayong заводида Colorado ва Trailblazer каби моделлар ишлаб чиқарилади. 2019 йилнинг ноябрь ойида GM Thailand Ўзбекистонга Chevrolet Trailblazer автомобилларининг партиясини юборган эди.
Мавзуга доир:
Изоҳ (0)