Бугун, 13 февралда Элтон Жон томонидан «XXI асрнинг Фрэнк Синатраси» деб таъриф берилган қўшиқчи Роберт Питер Уильямс 46 ёшга тўлди. Feel, Angels, Supreme ва бошқа бир қанча қўшиқлари билан яхши маълум бўлган ижодкор 1974 йил Англиянинг Сток-он-Трент шаҳрида Уильямслар оиласида таваллуд топган. 3 ёшлигида ота ва онаси ажрашгани боис, Робби ҳамда опаси Саллини онаси Жанет катта қилган. Робби биографияси ўрганилганда, аксарият муваффақиятга эришган машҳурлар болалигида дуч келган ёки лейбллар томонидан уларнинг имижларини кўтариш учун махсус тузиб берилганидек қийинчиликларни бошидан ўтказмагани, шунчаки омад ва ўзидаги истеъдоди сабаб шоу-бизнесга кириб келганини билиш мумкин.
У Mill Hill Primary School мактабини тамомлагач, таълимни Margaret Ward High School’да давом эттирган. Мактабни битиргач онасига гул дўконида ёрдамчи бўлиб ишлаган. Робби жуда ҳам ҳаракатчан бўлган, ўз устида ишлаган, мактабда бўлиб ўтадиган саҳна кўринишларида фаол иштирок этган. Theatre Royal театрида намойиш қилинган Оливер Твист спектаклидаги ижросини унинг ўзи энг омадли чиқишларидан деб ҳисоблайди. Унинг ҳаёти санъат билан боғланишига онаси сабабчи бўлган. Жанет кунлардан бир кун бутун Англия бўйлаб ўғил болалар мусиқий гуруҳи учун танлов ўтказилаётгани ҳақидаги эълонни олиб келади ва ҳаммаси шундан кейин бошланади.
Уильямснинг арсеналига назар ташланса, бир қанча пластинкалар, концерт дастурлари ва ҳатто қиролича Елизавета учун махсус чиқиш қилганини кўриш мумкин. Роббининг альбомлари 59 миллиондан, сингллари 18 миллиондан ортиқ, биргина Буюк Британиянинг ўзида қўшиқлари ёзилган дисклар 16 миллионга яқин нусхада сотилган.
Юлдузлик касали ёки эрта машҳур бўлиш сабабми, Робертда ўсмирлик даврида алкогол ва нарко қарамлик кузатилган. 1995 йилда Take That’нинг MTV Europe Music Awards’даги чиқишидан аввал гуруҳнинг бошқа аъзолари унинг реп ва ҳип-ҳоп йўналишда ижро қилиши кераклиги ҳақидаги фикрини ҳурмат қилмагани уни асабийлаштирган ва у аламини алкоголь ва гиёҳванд моддалардан олган. Ёзги олимпияда ўйинларининг ёпилиш маросимидаги чиқиши олдидан ғазабланган Робби концертни тарк этади ва гуруҳ таркиби 4 киши билан концертни давом эттиришига тўғри келади. Мухлисларга эса қўшиқчи туғруқхонага, турмуш ўртоғининг олдига кетгани айтилиб вазият «силлиқланади».
Уильямс мусиқада рекордсмен ҳисобланади ва у қўлга киритган мукофотлар билан танишгач, BRIT Awards ўз бисотидаги барча мукофотларни Роббига бериб юборган деган хулосага келиш мумкин. У жами 18 марта BRIT Awards’га лойиқ деб топилган, шунингдек, 8 та German ECHO Awards, 2 карра Grammy’га сазовор бўлган. 2005 йилда «Гиннесснинг рекордлар китоби»га даромади энг кўп қўшиқчи сифатида киритилган. Дунё бўйлаб Close Encounters Tour концерти ўтказилиши эълон қилганининг эртаси куниёқ шоу учун 1,6 миллион чипталар сотилган.
2002 йилда Робби EMI билан 80 миллион фунтлик шартнома имзолаган. Тарихда бундай катта даромадли шартнома фақат Майкл Жексон ва Sony/Epic/Warner ўртасида тузилганди. Карьераси ортидан миллионерга айланган қўшиқчининг ўзи иқтисодий аҳволи ҳақида шундай дейди: «Мен энг катта орзуларни тасаввур қила оладиган даражада бадавлатман».
Рекордлар ҳақида гап кетганда, 2003 йилнинг 1—3 август кунлари Британиянинг Knebworth Park майдонида ўтказилган концерти ҳақида таъкидламасликнинг иложи йўқ. Концертга жами 375 минг мухлис ташриф буюрган, онлайн трансляцияда бўлса, 3,5 миллион томошабин кузатган. Дастурдан кейин тақдим қилинган Live at Knebworth рекорд даражада кўп сотилган альбом сифатида тарихда қолган.
Ижодкор фақат ижод билан банд, қизиқишлари ҳам шу доира билан чекланган бўлади, деган фикрни Робби инкор қилади. У «Порт Вейл» футбол клубининг ҳақиқий фанатларидан бири ҳисобланади. FIFA 2010 компьютер ўйини учун It’s Only Us қўшиғидан фойдаланишга «Порт Вейл» ўйинга қўшилганидан кейингина рухсат берган. 2006 йилда Уильям севимли клубининг акционери ва эгаларидан бири бўлган.
Ижодкор футбол ва хайрия ишларини биргаликда олиб боради. У Soccer Aid хайрия футбол ўйинларидан тушган даромадни UNICEF фондига ўтказади ва фондни қўллаб-қувватлаш мақсадида турли хайрия концертларини уюштиради ҳамда Give It Sum фондининг асосчиси ҳисобланади.
Уильямс санъат, футбол ва хайриядан бошқа сиз билмаган кароматлари ҳам йўқ эмас. Унинг 2005 йилда Крис Хит билан биргаликда ёзган «Feel» китоби ҳамда орадан беш йил ўтгач эса концерт дастурларидаги яккахон чиқишларидаги фотолар ва уларга Робби томонидан берилган шарҳлар билан жамланган «You Know Me» китоби нашрдан чиққан. Бу ҳали ҳаммаси эмас, 2017 йилда Уильямснинг сўнгги 13 йилдаги ижодидан ҳисобот, шунингдек, Take That’га қўшилиши, шахсий ҳаёти ва бошқаларни ўз ичига олган «Reveal» автобиографик китоби тақдим қилинган.
Ёшликдаги шўхликлар, севги романларининг бари ортда қолган: айни дамда Робби севимли турмуш ўртоқ ва меҳрибон ота. У 2006 йилда америкалик актриса Айда Филд билан танишади ва ҳаёти тубдан ўзгаради. У туфайли гиёҳвандликдан қутулишга ҳаракат қилади ва чакишни ташлайди (ёки ташлагандек тутган ўзини) ва соғлом турмуш тарзини танлаган.
2010 йилда жуфтлик Лос-Анжелесда турмуш қурган ва тантанада Робби турмуш ўртоғига бағишлаб She’s The One қўшиғини куйлаган. Орадан икки йил ўтиб қўшиқчи ота бўлган ва қизини Теодор Роуз деб номлаган. 2014 йилда эса Уильямслар оила азъоси яна биттага кўпайган ва унга Чарльтон Валент деб исм қўйилган.
Изоҳ (0)