Наманганда вилоят ҳокимининг автомобили йўл ҳаракати қоидасини бузганлиги учун жаримага тортилди. Бу ҳақда «Дарё» мухбири Азизбек Абдувалиев хабар бермоқда.
Воқеа жорий йил 6 февраль куни содир бўлган. Шу куни соат 13:00 атрофида Тўрақўрғон туманидан ўтувчи Фарғона ҳалқа йўлининг 63-километрида, Шоҳидон—Кумидон йўналишида, вилоят ҳокимлигига тегишли Toyota Prado русумли давлат рақами 50 050 ААА бўлган автомобиль тезлик соатига 70 километр билан чекланган ҳудудда 81 километр тезликда ҳаракатлангани фоторадар қурилмалари ёрдамида аниқланган.
Жарима ҳужжатида қайд этилишича, бу билан Маъмурий жавобгарлик тўғрисидаги кодекснинг 128-3-моддаси, 1-қисмида кўзда тутилган ҳуқуқбузарлик содир этилган. Мазкур ҳолат базавий ҳисоблаш миқдорининг бир баравари миқдорида, яъни 223 минг сўм жарима белгиланишига асос бўлган.
Вилоят ҳокимлиги ахборот хизматининг «Дарё»га маълум қилишича, Toyota Prado ҳайдовчиси томонидан белгиланган жарима учун тўлов амалга оширилган.
Вилоят ҳокимлиги ички ишлар бошқармаси томонидан эса ҳокимлик транспорт воситалари ҳайдовчилари учун тушунтириш ишлари ўтказилган ва бундан кейинги фаолиятларида йўл ҳаракати қоидаларига қатъий амал қилиш бўйича кўрсатма берилган.
Қайд этиш жоизки, Наманганда ҳокимлик ва унинг мутасаддилари томонидан қонунчиликда белгиланган меъёрларга риоя этилиши устидан жиддий назорат ўрнатишга ҳаракат қилиб келинмоқда. Жумладан, олдинроқ Мингбулоқ тумани ҳокими Нуршод Худойбердиев Маъмурий жавобгарлик тўғрисидаги кодекснинг 41-моддасида кўрсатилган ҳуқуқбузарликни содир этган деб топилиб, БҲМнинг 20 баравари миқдоридаги жарима жазосига тортилганди.
Изоҳ (0)