Ўзбекистонда ҳозирда 22 мингта қурилиш ташкилоти давлатга солиқ тўлаб, қонуний тарзда фаолият юритмоқда. Бу ҳақда Ахборот ва оммавий коммуникациялар агентлигида Қурилиш вазирлиги мутасаддилари иштирокида ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Анжуманда айтилишича, охирги 2 йил давомида республика бўйича 3070 та объект қурилган бўлса, шундан 186 таси тендердан ўтган. Қолгани буюртмачилар орқали танланиб, пудратчи ташкилотларга бериб юборилган. Натижада қурилиш жараёни ва унда юзага келган камчиликларни назоратга олиш, шаффофликни таъминлаш анча қийин кечган.
—Очиғи, вазирлигимиз шу пайтга қадар қурилиш-пудрат ташкилотларини ўз ҳолига қўйганлиги туфайли улар фаолиятини 100 фоиз назорат қилолмаган. Буни яна бир сабаби борки, қурилиш фирмалари хусусий тадбиркорлик субъекти ҳисобланади ва шу боис ҳам фаолиятига аралаша олмаганмиз. Статистика қўмитаси тақдим этган маълумотларда мамлакатдаги жами қурилиш ташкилотлари сони 36 мингта эканлиги қайд қилинган. Аммо солиқ органлари ҳисоб-китобига кўра, мунтазам равишда солиқларни тўлаб келаётган ва ишлаётган фирмалар сони 22 мингтани ташкил қилмоқда.Ҳозирги кунда қурилиш ташкилотлари рейтингини тузиш масаласи кўриб чиқиляпти. Биз бу тизим орқали уларни назорат қилиш жараёнига кириб бормоқчимиз. Белгиланган категорияларни бажарган фирмалар рейтингга қўшилади ва улар тендерда қатнашиш имкониятига эга бўлади. Рейтинг талабларини вақтида бажармаган пудратчилар «қора дафтар»га тушади ва тендерларда иштирок этолмайди. 2021 йилгача «Шаффоф қурилиш» миллий ахборот тизимига рейтингдан жой олган ташкилотларнинг қанча ишчиси мавжудлиги тўғрисида тўлиқ маълумот киритилади. Шунингдек, қурилиш-пудрат ташкилотлари техник-хавфсизлик талабини ҳам ишлаб чиқяпмиз», — деди Қурилиш вазирининг биринчи ўринбосари Шерзод Ҳидоятов.
Бандлик ва меҳнат муносабатлари вазирлиги вакили Нозима Сулаймонованинг таъкидлашича, охирги 3 йилда ичида биргина қурилиш соҳасида 302 та бахтсиз ҳодиса содир бўлган. Улар оқибатида 119 нафар ишчи вафот этган, 117 нафари эса оғир тан жароҳати олган.
Изоҳ (0)