Қозоғистон жанубидаги оммавий тартибсизлик рўй берган вилоятда вазият барқарор. Бу ҳақда Жамбил вилояти ҳокими Бердибек Сапарбаев маълум қилди, деб хабар беради «РИА Новости».
Эслатиб ўтамиз, 7 февраль куни Жамбил вилояти Қўрдай тумани Масанчи қишлоғидаги маҳаллий аҳоли ўртасида оммавий жанжал келиб чиққан. Сўнгги маълумотларга кўра, ўн киши ҳалок бўлган, жанжалнинг 50 га яқин иштирокчиси қўлга олинган. Ёнғин оқибатида 25 та хусусий уй, 31 та тижорий объект ва 41 та автомобилга зарар етган.
Мамлакат Ички ишлар вазирлигининг маълумотларига кўра, можаро қозоқлар ва дунганлар ўртасида келиб чиққан. Барчасига маҳаллий дунганларнинг қозоқ эркакни калтаклаши сабаб бўлган.
«Ҳозирда Жамбил вилоятидаги Қўрдай туманида вазият барқарор. Барча ҳуқуқ-тартибот органлари маҳаллий ижро органлари билан ҳамкорликда иш олиб бормоқда», — дейди Сапарбаев.
Унинг таъкидлашича, можародан сўнг беш кун ичида 19 нафар полиция ходими шифокорга мурожаат қилган. «Ҳалок бўлганларнинг оиласига ёрдам кўрсатилмоқда. Комиссия аъзолари мамлакат раҳбари номидан ҳамдардлик билдирмоқда», — дейди вилоят ҳокими.
Аввалроқ Қозоғистон президенти Қосим-Жўмарт Тўқаев Қўрдай туманидаги оммавий жанжалдан сўнг бир неча мансабдорни ишдан бўшатгани ҳақида хабар берилганди.
Изоҳ (0)