Россия ҳукумати 2009 йилда Санкт-Петербургдаги полиция бўлинмасида қийноққа солинган ўзбекистонлик мигрантга 25 минг евро тўлаб беради. Бу ҳақда 4 февраль, сешанба куни, Страсбургдаги Инсон ҳуқуқлари бўйича Европа суди қарори чиқарилган ва сайтида эълон қилинган.
Маълум бўлишича, ўзбекистонлик мигрант Мўмин Султонов 2009 йилнинг сентябрида ўғирликда гумонланиб, иш жойида қўлга олинган ва Санкт-Петербург шаҳрининг Фрунзе ИИБ 47-полиция бўлимига олиб борилган. У ерда милиция ходимлари Султоновни ўласи қилиб калтаклаб, электрошок билан қийноққа солган ва содир этилган жиноятни ўз бўйнига олишни талаб қилган.
Кейинчалик Санкт-Петербургдаги 109-сонли касалхонада Мўмин Султоновнинг қўллари, бўйни, тиззалари ва танасининг бошқа қисмларида жароҳатлар мавжудлиги, чап кўзи калтакдан шишиб кетгани қайд этилган.
Мўмин Султонов қийноқларга солинганидан шикоят қилиб тергов қўмитаси ва прокуратурага мурожаат қилган, лекин Россия ҳуқуқ-тартибот идоралари жиноят иши қўзғатишни тўрт марта рад этган.
Судда Россия ҳукумати ўзбекистонлик муҳожирни Инсон ҳуқуқлари бўйича конвенция қоидаларини бузишда айблаб, Россияда мавжуд бўлган барча ҳуқуқий ҳимоя воситаларидан фойдаланмагандан сўнггина Европа судига мурожаат этиши кераклини таъкидлаб туриб олган.
Европа суди ҳимоянинг эътирозларини инобатга олмаган ва «жиноят иши қўзғатишни тўрт марта рад этиш судга боришга эҳтиёж ҳам қолдирмаганини» таъкидлаган.
Самарқандлик мигрант иши Европа судига 2019 йил май ойида юборилган. Суд қарорига биноан, Россия ҳукумати қарор қабул қилинганидан кейин мигрантга уч ой ичида 25 минг еврони тўлиқ тўлаб бериши керак. Ҳужжатга мувофиқ, Россия ҳукумати белгиланган муддатни бузган тақдирда Ўзбекистонга жарима тўлайди.
Изоҳ (0)