Хитой ҳозирда чет эл фуқароларини Ухандан эвакуация қилиш масаласини кўриб чиқмаяпти

27 январь куни Хитой Ташқи ишлар вазирлигида Пекин шаҳрида аккредитация қилинган чет эл дипломатик ваколатхоналари ва халқаро ташкилотлар раҳбарлари ҳамда вакиллари учун брифинг бўлиб ўтди. Бу ҳақда Ўзбекистоннинг Пекин шаҳридаги элчихонасига таяниб, Ташқи ишлар вазирлиги хабар берди.

Брифингда хотиржамликни сақлаш зарурлиги таъкидланиб, бир қатор тавсиялар берилган:

• Саросимага тушиш вируснинг ўзидан ҳам кучлироқ таҳдид бўлиши мумкин. Хитой бугунгача вужудга келган барча кенг кўламли эпидемияларни бартараф этган, коронавирусни ҳам енгади;
• Коронавирусни даволаб бўлади. Хитой барча имкониятларни ишга солмоқда. Агар Хитой ўз олдига бирор мақсад қўйса, албатта, унга эришади;
• Хитой чет эл фуқароларининг ўз ҳудудидаги хавфсизлигини таъминлаш бўйича барча халқаро мажбуриятларни бажаради. Вазирлик ва идоралар, шунингдек, провинция ва шаҳарларнинг расмий идоралари чет эл дипломатик миссияларига уларнинг Ухань шаҳри ва Хитойнинг бошқа шаҳарларида муаммога дуч келган фуқаролари хавфсизлигини таъминлаш борасида ёрдам беришга тайёр. Ҳозирда Ухань шаҳри мамлакатнинг бошқа шаҳарларига қараганда хавфсизроқ. Чунки у ерга энг яхши мутахассислар, энг илғор қурилма ва технологиялар сафарбар қилинган.

Элчихона январь ойида Ухандан ватанга қайтиб келган ўзбекистонлик талабаларни зудлик билан Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлиги билан +998(90)988-23-30 (директор ўринбосари Б.Қурбонов), +998(97)275-50-74 (бош мутахассис Ф.Қурбонбеков) телефон рақамлари орқали боғланишни қатъий тавсия қилади.

Ташқи ишлар вазирлиги Хитой ҳудудидаги Ўзбекистон фуқароларига зарур ҳолатларда исталган вақтда мамлакатнинг Пекин шаҳридаги элчихонасига +86 135 1102-4242 (Бобур Яҳёев), +86 139 1175-4476 (Шуҳрат Умиров) телефон рақамлари орқали ҳамда Шанхай шаҳридаги Бош консулхонасига +86 131 2255-5772 (Азиз Улуғбеков) телефон рақами орқали мурожаат қилиши мумкинлигини эслатиб ўтади.

Маълумот учун, Хубэйдаги Ухань шаҳри коронавирус ўчоғи ҳисобланади. Бундан ташқари, яна ўндан ортиқ мамлакатда худди шу вирус билан касалланиш ҳолатлари аниқланган. Эпидемия сабаб Хитойдаги умумий аҳолиси 57 миллион кишига тенг 15 та шаҳар тўлиқ ёки қисман ёпилган. Хитой раҳбари Си Цзиньпин вазиятни мураккаб деб атаган. Ўзбекистонда ушбу вируснинг мамлакатга кириб келмаслиги учун чоралар кўрилмоқда.

Аввалроқ Франция ва Япония Ухандаги фуқароларини эвакуация қилиши мумкинлиги ҳақида хабар берилган эди.