Коронавирус жўнатмалар орқали юқмаслиги маълум қилинди

Янги коронавирус тарқалган Хитойдан келган жўнатмалар хавфсиз ҳисобланади. Бу ҳақда «Роспотребнадзор» раҳбари Анна Попова маълум қилди, деб ёзмоқда «Коммерсантъ».

Касаллик 2019 йилнинг декабрь ойи охирида Хитойда тарқалишни бошлади. Бугунги кунга келиб касалликдан 80 киши вафот этди, 2700 дан ортиқ киши бу касалликка чалингани қайд этилган.

Тасдиқланмаган маълумотларга кўра, вирус 40 даражадан ортиқ иссиққа чидай олмайди ва атроф-муҳитда узоқ вақт тура олмайди. Маълум қилинишича, касалликнинг буюмлар ва жўнатмалар орқали юқиш ҳолати қайд этилмаган.

Маълум бўлишича, «Роспотребнадзор» коронавирус мавжудлиги гумон қилинган 100 дан ортиқ кишини аниқлаган, уларнинг бирортасида ҳам коронавирус ташхиси тасдиқланмаган. Россияда касалликни аниқлаш учун иккита синов тизимидан фойдаланилмоқда. Айни пайтга қадар Россияда касаллик билан зарарланиш ҳолатлари қайд этилмаган.

Экспертларнинг фикрича, Хитойда тарқалган коронавируснинг биринчи ташувчиси ёввойи ҳайвонлар бўлиши мумкин. Вируснинг тарқалиш ўчоғи Ухань шаҳридаги бозор — ёввойи ҳайвонлардан пиширилган таомлар сотиладиган жой ҳисобланади.

Хитой фуқаролари 30 январга қадар янги турдаги коронавируснинг асосий ўчоғига айланган Ухань шаҳрининг чегарасини кириш мақсадида ҳам, чиқиш мақсадида ҳам кесиб ўта олмайди.

Эслатиб ўтамиз, 25 январь, шанба куни, Ўзбекистон ташқи ишлар вазири Абдулазиз Комилов янги типдаги коронавирус тарқалаётган Хитойнинг Ухань шаҳрида бўлиб турган 30 дан ортиқ ўзбекистонлик талаба ватанга қайтарилишини маълум қилган. Ундан аввал Хитойда бўлиб турган ва у ерга бормоқчи бўлган ўзбекистонликларни огоҳлантирган, сўнгра ССВ чегарада санитар назорат кучайтирилганини билдирган, ТИВ фуқароларни хавфли ўткир респиратор вирус юқтириш хавфидан яна огоҳлантирган, Соғлиқни сақлаш вазирлиги 23 январь, пайшанба куни, ўзбекистонликларнинг коронавирус бўйича эпидемик вазиятдан хавотирланишига асос йўқлигини хабар қилган. 24 январь, жума куни, ТИВ коронавирус тарқалган Хитойнинг Ухань шаҳрида 30 нафар ўзбекистонлик борлиги ва уларнинг аксарияти талабалар экани ҳақида маълумот берган. 27 декабрь, душанба куни, Ўзбекистон соғлиқни сақлаш вазири ўзбекистонликлардан Хитойга, зарурат бўлмаса бошқа давлатларга ҳам бормасликни сўради. Соғлиқни сақлаш вазирлиги эса Жиззахда коронавирус тарқалгани ҳақидаги гап-сўзларни инкор этди.