Халқаро пресс-клубнинг навбатдаги сессиясида Президент Шавкат Мирзиёевнинг мурожаатномасида илгари сурилган ғоя ва ташаббуслар, уларни амалга ошириш билан боғлиқ масалалар муҳокама қилинди, деб хабар беради ЎзА.
Сессияда иштирок этган адлия вазири Русланбек Давлетов мурожаатномада қайд этиб ўтилган «ҳалоллик вакцинаси» ҳақида ўз фикрини билдирди.
Вазирнинг қайд этишича, мурожаатномада «ҳалоллик вакцинаси» ҳақида сўз юритилиши билан бирга, у нима экани ҳам очиб берилди. Рақамли иқтисодиёт, шаффофлик, суд тизимининг мустақиллиги, қонун устуворлиги амалда қандай таъминланиши бўйича айтилган мулоҳазаларнинг барчаси замирида, айниқса, шаффофлик тамойилида бу вакцина.
«Институционал жиҳатдан кейинги босқичга ўтиш жараёнида коррупцияга қарши курашиш учун алоҳида орган тузиш таклиф этилди. Ҳуқуқшунос сифатида бу ҳаракатни олқишлаймиз. Чунки маълум бир орган ўзининг асосий вазифаси сифатида бу иш билан шуғулланмаса, барибир биз кутган натижага эришиш қийин. Бироқ орган тузиш қийин эмас, лекин шу орган эртага қандай ишлаб кетади? Шунга жиддий эътибор қаратиш зарур. Чунки бизда йиллар давомида шаклланган органлар тизими бор. Уларнинг функция ва вазифалари белгиланган ҳамда улар тезкор гуруҳлар ва бошқа воситаларга эга. Шунинг учун янги орган тузишда органлардаги параллелизм, яъни такрорланишни йўқотиш, ваколатларни аниқ белгилаш зарур. Энг асосийси, унинг мустақиллигини таъминлаш керак. Зеро ҳозирдан одамларда бу орган тузилса, уни ким назорат қилади, деган савол туғилмоқда. Шунинг учун бунинг ечими – шаффофлик ва ҳисобдорлик бўлиши даркор. Ўйлаймизки, илгари сурилган янги ғоя жамиятда чинакам ўзгаришга олиб келади», — дейди адлия вазири.
Изоҳ (0)