Ўтган давр мобайнида Бюро органлари томонидан энергия ресурсларларига ўзбошимчалик билан уланиш ва ноқонуний фойдаланиш ҳолатларини фош этиш бўйича муайян ишлар амалга оширилмоқда. Бу ҳақда МИБ матбуот хизмати «Дарё» га хабар берди.
Қайд этилишича, қиш мавсумида ҳароратнинг пасайиши оқибатида энергия ресурсларига бўлган эҳтиёж кескин ортади ва айрим истеъмолчилар томонидан табиий газ тармоқларига ўзбошимчалик билан уланиш ва талон-торож қилиш ҳолатларининг кўпайиши кузатилади.
Бюронинг Тошкент шаҳар бошқармаси ва Юнусобод туман бўлими томонидан, ўтган 2019 йилнинг 1 ноябрь кунидан 31 декабрь кунига қадар Юнусобод туман ҳудудида ўтказилган тезкор-қидирув мониторинг тадбирлари ўтказилган.
Натижасида, Ўзбекистон Республикаси Вазирлар Маҳкамасининг 2018 йил 12 январдаги 22-сонли қарори билан тасдиқланган «Табиий газдан фойдаланиш қоидалари»нинг 140-банди ҳамда 2002 йил 28 мартдаги 99-сон қарори билан тасдиқланган «Газни ҳисобга олиш приборларини сотиб олиш, уларни квартираларда ва якка тартибдаги уйларда ўрнатиш ва улардан фойдаланиш тартиби тўғрисидаги Низом»нинг 44-бандига зид равишда ўзи яшаб келаётган хонадонда газ ҳисоблагичсиз табиий газ тармоғига тўғридан-тўғри резина шланг ёрдамида қўлбола иситиш печини улаб, иссиқхонани иситиш мақсадида ўзбошимчалик билан табиий газдан фойдаланиб келган жами 1,56 гектар майдонда 37 та хонадонлар аниқланган.
Жумладан, Юнусобод тумани Хўжаобод 1-тор кўчаси 13-уйда Д.Улуғхўжаев, Аҳроробод кўчасида яшовчи З.Худайберганова, М.Алиев кўчасида яшовчи Б.Сулайманов, О.Мирҳабибов кўчасида яшовчи фуқаро С.Аъзамов, Гулистон кўчасида яшовчи З.Маҳкамов ва бошқалар томонидан ноқонуний равишда ташкил этилган иссиқхоналар аниқланиб, ушбу иссиқхоналар ишлаши натижасида 194 010 метр куб табиий газдан ноқонуний равишда фойдаланилганлиги ва бунинг натижасида давлат манфаатларига 73 724 058 сўмлик моддий зарар етказилганлиги аниқланди.
Тадбирлар давомида етказилган зарар қопланишига эришилди.
Изоҳ (0)