Жиззах вилояти Шароф Рашидов туманидаги Зиёкор маҳалласида уч нафар ака-ука ва уларнинг онаси ис газидан заҳарланди. Бу ҳақда Соғлиқни сақлаш вазирлиги жамоатчилик билан алоқалар бўлими «Дарё»га маълум қилди.
Фожиа оқибатида болалар вафот этган, она – реанимация бўлимида қолмоқда.
Қайд этилишича, кўнгилсиз ҳодиса 25 январь куни тонг соат 05:10 лар атрофида рўй берган.
«Вафот этган болалар 8, 12 ва 14 ёшларда, уларнинг ҳаммаси ўғил болалар бўлган. Болаларнинг онаси, 37 ёшли С.А. ҳозир реанимация бўлимида, шифокорлар унинг ҳаёти учун курашмоқда», – дейилади ССВ хабарида.
Эслатиб ўтамиз, Ўзбекистонда январь ойининг ўзида ис газидан заҳарланиш оқибатида 11 киши ҳалок бўлди. Жумладан, 5 январь куни Фарғонада икки ёшли гўдак ва унинг уч ёшли опаси ис газидан заҳарланиб вафот этди. 6 январь куни Тошкентда ис газидан заҳарланиш оқибатида 32 ёшли аёл ва унинг 2 ёшли фарзанди ҳаётдан кўз юмди.
9 январь куни Жиззах вилояти Ғаллаорол туманида 9 январь куни ис газидан заҳарланиш оқибатида 4 кишидан иборат оиланинг барча аъзоси вафот этди.
Изоҳ (0)