MIB Toshkentda noqonuniy tashkil etilgan issiqxonalar faoliyatiga chek qo‘ydi

O‘tgan davr mobaynida Byuro organlari tomonidan energiya resurslarlariga o‘zboshimchalik bilan ulanish va noqonuniy foydalanish holatlarini fosh etish bo‘yicha muayyan ishlar amalga oshirilmoqda. Bu haqda MIB matbuot xizmati “Daryo” ga xabar berdi.

Qayd etilishicha, qish mavsumida haroratning pasayishi oqibatida energiya resurslariga bo‘lgan ehtiyoj keskin ortadi va ayrim iste’molchilar tomonidan tabiiy gaz tarmoqlariga o‘zboshimchalik bilan ulanish va talon-toroj qilish holatlarining ko‘payishi kuzatiladi.

Byuroning Toshkent shahar boshqarmasi va Yunusobod tuman bo‘limi tomonidan, o‘tgan 2019-yilning 1-noyabr kunidan 31-dekabr kuniga qadar Yunusobod tuman hududida o‘tkazilgan tezkor-qidiruv monitoring tadbirlari o‘tkazilgan.

Natijasida, O‘zbekiston Respublikasi Vazirlar Mahkamasining 2018-yil 12-yanvardagi 22-sonli qarori bilan tasdiqlangan “Tabiiy gazdan foydalanish qoidalari”ning 140-bandi hamda 2002-yil 28-martdagi 99-son qarori bilan tasdiqlangan “Gazni hisobga olish priborlarini sotib olish, ularni kvartiralarda va yakka tartibdagi uylarda o‘rnatish va ulardan foydalanish tartibi to‘g‘risidagi Nizom”ning 44-bandiga zid ravishda o‘zi yashab kelayotgan xonadonda gaz hisoblagichsiz tabiiy gaz tarmog‘iga to‘g‘ridan-to‘g‘ri rezina shlang yordamida qo‘lbola isitish pechini ulab, issiqxonani isitish maqsadida o‘zboshimchalik bilan tabiiy gazdan foydalanib kelgan jami 1,56 gektar maydonda 37 ta xonadonlar aniqlangan.

Jumladan, Yunusobod tumani Xo‘jaobod 1-tor ko‘chasi 13-uyda D.Ulug‘xo‘jayev, Ahrorobod ko‘chasida yashovchi Z.Xudayberganova, M.Aliyev ko‘chasida yashovchi B.Sulaymanov, O.Mirhabibov ko‘chasida yashovchi fuqaro S.A’zamov, Guliston ko‘chasida yashovchi Z.Mahkamov va boshqalar tomonidan noqonuniy ravishda tashkil etilgan issiqxonalar aniqlanib, ushbu issiqxonalar ishlashi natijasida 194 010 metr kub tabiiy gazdan noqonuniy ravishda foydalanilganligi va buning natijasida davlat manfaatlariga 73 724 058 so‘mlik moddiy zarar yetkazilganligi aniqlandi.

Tadbirlar davomida yetkazilgan zarar qoplanishiga erishildi.