Россиянинг Томск вилоятида юз берган ёнғинда ҳалок бўлганлар сони 12 кишига етди, деб хабар бермоқда РБК. Аввалроқ 11 киши ҳалок бўлгани, улардан 10 нафари Ўзбекистон фуқаролари эканлиги аниқланганди.
Ёнғин сабабларини аниқлаш бўйича Тергов қўмитаси томонидан ўтказилган қўшимча текширувлар давомида яна бир кишининг жасади топилган. Энди унинг шахсини аниқлаш лозим.
Эслатиб ўтамиз, воқеа 21 январь куни эрта тонгда Россиянинг Томск вилояти Асино тумани Причулим посёлкасида аҳоли яшаш пунктидаги ёғочдан қурилган уйда содир бўлган. Қутқарувчиларга ёнғин ҳақидаги хабар Москва вақти билан соат 00:05 да келиб тушган. Воқеа жойига ўт ўчирувчилар келгунга қадар бино тўлиқ ёнаётган бўлиб, ундан 3 киши чиқиб кетишга улгурган.
Ёнғин бартараф этилганидан сўнг қутқарувчилар 11 кишининг жасадини топган, шулардан 10 нафари Ўзбекистон фуқаролари бўлган. Терговчиларнинг айтишича, уларнинг барчаси «Гринвуд» ёғоч тайёрлаш компанияси ишчиларидир.
Дастлабки маълумотларга кўра, ёнғинга электр иситгичнинг носозлиги сабаб бўлган, деб тахмин қилинмоқда.
Изоҳ (0)