Самарқанд туман ҳокимлиги нашри — «Гулобод тонги» газетаси муҳаррири Н. Каримов туман маҳалла жамоат фонди раҳбарини обуна режасини бажармагани учун койийди, ваъдабозликда айблайди. Бу ҳақда «Дарё» ўқувчилари томонидан юборилган хатда маълум қилинган.
«Дарё» таҳририятига юборилган хатдан маълум бўлишича, газета муҳаррири раҳбарга йиллик 740 дона обуна қилиб бериши лозимлигини, аммо ваъда бажарилмаганини ёзади. Бўлимда обунага панжа орасидан қаралаётганини айтади.
— Раҳбар қайси лавозим ва мансабда бўлишидан қатъи назар энг аввало пок лафзи, сиёсий иродаси, қатъият ва маънавияти, ташкилотчилик ва талабчанлиги билан эл-юрт эътиборини қозона олади? Шундай эмасми? — дейди газета муҳаррири маҳалла жамоат фонди раҳбарига ёзган хатида.
Хатдан аниқланишича, газета муҳаррири обуна масаласида туман Маҳалла жамоат фонди раҳбарининг олдига 3 марта, ходимлари эса 5-6 марта борган.
Газета муҳаррири бўлим раҳбари М. Набиевга ёзган хатида бўлим 237 дона обуна бўлганини ёзар экан, бўлимда аниқ ҳисоб-китоб йўқлигини, назорат ва ижро сустлигини танқид қилади. Газета январь ойи сонининг 503 нусхаси бўлимга қарашли маҳаллаларга тегишли эканлигини айтиб, мазкур газеталар нархи 1 миллион 760 минг 500 сўм бўлишини маълум қилади.
— Ваъдабозлик, ўзибўларчилик, обунани ўйинга айлантириш ҳавойи рақамларни пеш қилиш таҳририят учун оғир зарба эканлигини сизга эслатмоқчимиз, — дейилади хатда. Ва бўлим томонидан амалга оширилаётган ишлар газетада чоп этилмаса, мақсадга мувофиқ бўлмаслигини таъкидлайди.
Изоҳ (0)