Тошкентнинг Мирзо Улуғбек туманида 18 январь куни соат тахминан 11:25 да Тошкент ҳалқа автомобиль йўли—Дўрмон йўли чорраҳасида 1993 йилда туғилган Д.Ш. ишонч қоғози асосида Spark’ни хавфсизлик камари тақмай бошқариб кетаётгани сабабли, шу ерда хизмат олиб бораётган йўл инспектори Б.Султонов ҳайдовчига тўхташ тўғрисида ишора берган.
ИИВ ЙҲХББ матбуот хизматидан «Дарё»га маълум қилишларича, ҳайдовчи ходимнинг талабига бўйсунмай, уни уриб юбориб, воқеа жойидан кетиб қолган. Сўнг Зиёлилар—Темур Малик кўчалари чорраҳасида уни тўхтатиш мақсадида олдига чиққан бошқа йўл инспектори Ў. Қўчқоровни ҳам уриб юбориб, воқеа жойидан яширинган.
«Ў.Қўчқоров олган тан жароҳати сабабли ИИВ Марказий госпиталига ётқизилган», — дейилади ИИВ ЙҲХББ ахборотида. Кўрилган чоралар натижасида ҳайдовчи Д.Ш. ушланган. Унинг ҳужжатлари текширилганда, транспорт воситасини қайд этиш гувоҳномаси (техпаспорт) бўлмаганлиги аниқланган.
Ҳозирда прокуратура идоралари томонидан терговолди текширув-суриштирув ҳаракатлари олиб борилмоқда.
Изоҳ (0)