Хитойда коронавируснинг янги тури пайдо бўлгани хақида хабар берилган эди. Ўзбекистон Санитария-эпидемиологик осойишталик агентлиги матбуот хизмати ушбу касаллик тўғрисида маълумот берди.
Жаҳон соғлиқни сақлаш ташкилотининг Европа минтақавий бюросининг маълумотларига кўра Хитойда коронавируснинг янги типи эпидемияси юзага келган. Хитойнинг Ухан шаҳар Соғлиқни сақлаш қўмитаси 2019 йилнинг декабрь ойининг охирида Ухан шаҳар Хубей провинциясида номаълум этиологияли пневмония касаллиги тарқалганлигини маълум қилган.
Хитойнинг Халқаро тиббий-санитария қоидалари (ХТСҚ) миллий координатори маълумотига кўра 2020 йилнинг 11 январь ҳолатига Ухан шаҳрида 41 та ҳолатда вирусли пневмония касаллиги аниқланган, уларда бир киши вафот этган, 6 нафари соғайиб шифохонадан чиқарилган. Беморларнинг кўпчилиги тана ҳароратининг юқорилиги ҳамда нафас олишининг қийинлашишига шикоят қилган. Кўкрак қафасининг рентгенография хулосасига кўра айрим ҳолатларда беморларнинг ўпкалари шикастланган.Беморлар билан мулоқотда бўлган 739 нафар, шулардан 419 нафари тиббиёт ходимлари тиббий назоратга олинган. Ҳозирча улар орасида касаллик аломатлари аниқланмаган.
Миллий координаторнинг маълумоти асосида ХТСҚ-2005 мезонлари бўйича ушбу касалликнинг халқаро миқёсда тарқалиш хавфи ҳамда халқаро савдо ва саёҳатларга тўсқинлик йўқлиги маълум қилинган. Бугунги кунда касалликни одамдан одамга юқиши аниқланмаган.
Қайд этилишича, аҳолининг санитария-эпидемиологик осойишталигини таъминлаш, касалликнинг кириб келиши ва тарқалишини олдини олиш мақсадида Ўзбекистон Санитария-эпидемиологик осойишталик агентлиги томонидан қуйидаги чора-тадбирлар амалга оширилмоқда:- давлат чегараси кесишган жойлардаги санитария-карантин пунктларидан ўтаётган йўловчиларни сифатли тиббий–санитария кўригидан ўтказиш, айниқса, Хитойдан келаётганларга алоҳида эътибор қаратилмоқда;
- пневмония ва бошқа ўткир респиратор касалликлари аломатлари билан аниқланган беморларни алоҳидалаш ва шифохоналарга ётқизиш чоралари кўрилмоқда;
- грипп, ЎРИ ва пневмония касалликларига гумон қилинган беморларни шифохоналарга ётқизиш учун даволаш – профилактика муассасаларини тайёргарлигини таъминлаш, беморларни даволаш учун дори-дармонлар ва дезинфексион моддаларни захираси яратилди;
- Хитойдан келаётган йўловчиларда, грипп касаллигининг оғир турларига, ЎРИ ва пневмония касалликларига гумон қилинган беморлар аниқланганда лаборатория ташхиси учун намуналар олишни ташкил этиш;
- агентлик мутахассислари томонидан учувчилар, борт кузатувчилар, темир йўл проводникларини билим савиясини ошириш мақсадида грипп, ЎРИ ва ўткир пневмония касалликларининг клиникаси, лаборатория ташхиси, профилактик ва эпидемияга қарши чора-тадбирлари тўғрисида семинарлар ўтказилмоқда.
Аввалроқ Ўзбекистон ТИВ Хитойда тарқалган янги вирус сабабли у ерга бормоқчи бўлган ўзбекистонликларни эҳтиёт бўлишга чақирган эди.
Изоҳ (0)