Эрон АҚШни Украина халқаро авиакомпаниясининг Боинг самолёти ҳалокати терговида иштирок этишга чақирди. АҚШ Миллий транспорт хавфсизлиги кенгаши (NTSB) бу борада Эрондан расмий хат олган. РБКнинг хабар беришича, бу ҳақда Reuters томонидан келтирилган NTSB баёнотида айтилган.
Унда айтилишича, NTSB ҳалокат сабабларини ўрганиш бўйича ўз вакилини тайинлаб бўлган. «NTSB авиаҳалокат атрофидаги вазиятни кузатишни ва ўзининг терговда иштирок этиш даражасини баҳолашда давом эттиради», — дейилади баёнотда.
Қайд этилишича, Boeing компанияси тергов ишларида NTSB’ни қўллаб-қувватлашини билдирган.
Эслатиб ўтамиз, Теҳрон яқинида Boeing 737 самолётининг қулаши оқибатида 176 киши — 82 нафар эронлик, 63 нафар канадалик, 11 нафар украин, 10 нафар швед, тўрт нафар афғон, уч нафар немис ва уч нафар британиялик ҳалок бўлган эди.Америка ОАВ, жумладан, CNN манбалари самолётнинг қулашига ракета учиришдаги хато ҳам сабаб бўлиши мумкинлиги ҳақида хабар тарқатган. Иорданиянинг «Al-Hadath» нашри самолёт тасодифан Эрон ракетаси билан уриб туширилган бўлиши мумкин, деб ёзганди. Эрон ҳукумати эса двигателдаги алангаланиш ҳалокатга сабаб бўлганини маълум қилди.
Кейинроқ Канада бош вазири Украина самолётини Эрон ракетаси уриб туширганини маълум қилган. Буюк Британия бош вазири Борис Жонсон ҳам канадалик ҳамкасбининг фикрини қўллаб-қувватлаб чиқди — унинг айтишича, Британияда самолёт Эрон ракетаси билан уриб туширилганини тасдиқловчи далиллар бор.
Даҳшатли ҳалокат туфайли Эрон ва Украинада 9 январь мотам куни деб эълон қилинди.
Изоҳ (0)