Хитойнинг «Chinese academy of Cultural heritage» ташкилоти томонидан ажратилган 9,5 миллион доллар инвестиция маблағлари ҳисобига Хива шаҳар «Ичан-қалъа» давлат музей-қўриқхонасида жойлашган «Амир Тўра» мадрасаси, «Ҳасан Мурод қушбеги» масжиди ва «Заргарлар» кўчасининг 500 метр ичкари йўлагида реконструкция ва қайта таъмирлаш ишлари амалга оширилди. Бу ҳақда Хоразм вилояти Туризмни ривожлантириш департаменти матбуот хизмати хабар берди.
«Амир Тўра» мадрасаси «Ичан-қалъа» мажмуасининг шимолий қисмида, аҳоли истиқомат қиладиган ҳудудда жойлашган. Ушбу мадраса 1870 йил Амир Тўранинг акаси Муҳаммад Раҳимхон II (1863—1910) томонидан қурилган. Мадрасанинг асосий олд қисми саккиз қиррали токча ҳамда икки қаватли қанот аркли баланд портал кўринишида бўлиб, олд қисмининг қолган баланд деворлари ҳам икки қаватлилик кўринишини ифода этади.
«Ҳасан Мурод қушбеги» масжиди XVIII аср охири XIX бошларида Боғча дарвоза яқинида қурилган. Мазкур масжид ака-укалар Хасан Мурод қушбеги билан биргаликда Ниёз оталиқ томонидан маҳалла ичида бунёд қилинган. Масжидда бир устунли ёзги айвон ва гумбаз билан бостирилган қишки масжид бор. Эшиклари исломий нақшлар билан безатилган.
Изоҳ (0)