Давлатга қарши хиёнат бўйича айбланган ТИВнинг собиқ ходими Қодир Юсуповга суд ҳукми эълон қилинди

Бугун, 9 январь, Ўзбекистон Ҳарбий судида Жиноят кодексининг 157-моддаси (Давлатга қарши хиёнат) бўйича айбланган Ташқи ишлар вазирлиги собиқ ходими, Ўзбекистоннинг ЕХҲТдаги вакили Қодир Юсуповга нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди.

Олий суд матбуот котибининг хабар беришича, бир неча ой давомида ўтказилган ёпиқ суд мажлисида судланувчи ва гувоҳларнинг кўрсатмалари тингланиб таҳлил қилинди. ДХХ Тергов бошқармаси томонидан тўпланган далилларга баҳо берилиб, судланувчининг важлари текширилди.

Суд жиноят иши материалларини ҳар томонлама ва тўлиқ ўрганиб, судланувчи Қодир Юсупов давлатга хоинлик қилиш жиноятини содир этганликда айбли деб топди. Судланувчига нисбатан жазо чораларини белгилашда суд Ўзбекистон Конституцияси ва жиноят қонунчилигида белгиланган инсонпарварлик ва адолат тамойилларига ҳам асосланди.

Натижада содир этилган жиноятнинг хусусияти ва ижтимоий хавфлилик даражаси, судланувчининг шахси, оилавий аҳволи каби жазони енгиллаштирувчи ва оғирлаштирувчи ҳолатлар эътиборга олиниб, Қодир Юсуповга 5 йил 6 ой муддатга озодликдан маҳрум қилиш жазоси тайинланди.

Эслатиб ўтамиз, ТИВнинг собиқ амалдори, Ўзбекистоннинг ЕХҲТдаги (Европада хавфсизлик ва ҳамкорлик ташкилоти) вакили лавозимида ишлаган Қодир Юсуповга қарши 2018 йилнинг 1 декабрида ДХХ томонидан давлатга хоинлик қилиш бўйича жиноят иши қўзғатилган эди. 23 май куни иш кўриб чиқиш учун Ҳарбий судга тақдим этилган.

67 ёшли собиқ дипломат 2018 йил 3 декабрь куни Тошкент метрополитенининг «Пушкин» метро бекатидаги темир йўл рельсига йиқилиб тушгач, шифохонага ётқизилганди. Шундан сўнг у шифохонадан ДХХ Тергов бошқармаси қамоқхонасига ўтказилган.

Унга нисбатан ҳибсга олингандан буён руҳий қийноқлар қўлланилаётгани, зарур дори воситаларидан маҳрум этилгани ҳамда оиласи кузатув остида экани ва тазйиқларга учраётганини ҳақида хабарлар тарқалган эди.

Human Rights Watch ташкилоти 12 июнь куни эълон қилган баёнотда Ўзбекистон ҳукумати зудлик билан Қодир Юсуповни озод қилиш, шунингдек, у билан ноқонуний муомалада бўлишга алоқадор шахсларни жавобгарликка тортишга чақирган.

Бош прокуратура Қодир Юсуповга қийноқлар қўлланилганини рад этган.