Telegram’даги «Қўшни маҳалла» каналида Қашқадарё вилоятининг Деҳқонобод туманидаги Шамоликам қишлоғида мактаб ўқитувчиси этик кийган ҳолда ўқувчиларни мактабга ёки уйига етиб олиши учун бирма-бир дарёдан ўтказаётгани акс этган сурат эълон қилинди.
Қайд этилишича, баҳор, куз ва қиш ойларининг ҳар куни шундай ҳолатда ўтади. Ёмғир ёққан куни дарёга сел келади. Сел келса, болалар қирғоқнинг ё у ё бу томонида қолади. Мактабга келган ўқувчи селдан ўтолмай мактабда қолиб кетадиган ҳолатлар ҳам учраб туради.
«Кўприкни сув оқизмаган, чунки бу ерда ҳеч қачон кўприкнинг ўзи бўлмаган», — дейилади хабарда. Хабар сўнгида ҳолат бўйича Халқ таълими вазирлиги ва Деҳқонобод тумани ҳокимлигидан изоҳ сўралган.
Ўзбекистон Халқ таълими вазирлиги макур ҳолат юзасидан муносабат билдирди.
Вазирлик муносабатига кўра, Халқ таълими вазирлиги ваколатларига жойларда кўприк ёки бошқа объектларни қуриш масалалари кирмайди. Жойларда инфратузилмаларни ривожлантириш учун маҳаллий ҳокимликлар жавобгар.
Қайд этилишича, 2018 йилнинг 5 сентябрь куни Ўзбекистон Республикаси Президентининг «Халқ таълимини бошқариш тизимини такомиллаштириш бўйича қўшимча чора-тадбирлар тўғрисида» фармони қабул қилинган.
Вазирликнинг қайд этишича, мазкур фармоннинг учинчи бандига мувофиқ, халқ таълими муассасаларини қўллаб-қувватлаш ва уларнинг инфратузилмасини ривожлантириш масаласи, хусусан уларга туташ ҳудудларни ободонлаштириш, инфратузилмани (тротуарлар, йўллар ва бошқалар) зарур ҳолатда сақлаш бўйича буюртмачи функциясини амалга оширишда Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари амалий ёрдам кўрсатиши зарур.
Деҳқонобод туман ҳокимлиги томонидан маълум қилинишича, мазкур ҳолатга туман ҳокими Зоир Алиқулов эътибор қаратди ва тез орада ҳокимликнинг ушбу масала юзасидан муносабати эълон қилинади.
Изоҳ (0)