Reuters: Боғдод шимолига берилган авиазарба оқибатида олти киши ҳалок бўлди

Ироқдаги шиаларнинг «Халқ сафарбарлиги кучлари»га қарашли автоколонна Бағдод шимолидаги лагер яқинида авиазарбага учради, деб хабар беради Reuters.

Ҳужум оқибатида олти киши ҳалок бўлган, яна уч киши оғир жароҳат олган.

Агентлик манбасига кўра, ҳужум маҳаллий вақт билан 01:12 да амалга оширилган. Колоннадаги учта автомобилдан иккитаси ичидаги олти нафар кўнгилли аскар билан ёниб кетган.

Кейинроқ авиазарба амалга оширилганини Ироқ давлат телевидениеси ҳам тасдиқлаган. Зарба АҚШ томонидан амалга оширилгани айтилмоқда.

Эслатиб ўтамиз, 3 январга ўтар кечаси АҚШ томонидан Боғдод аэропортига берилган авиазарба оқибатида «Ал-Қудс» махсус бўлинмасининг раҳбари генерал Қосим Сулаймоний ўлдирилган эди. Пентагоннинг маълум қилишича, Сулаймоний америкалик дипломатларга қарши ҳужум уюштиришни режалаштирган, шунингдек, америкалик «юзлаб ҳарбийларнинг» ўлимига жавобгар бўлган. Сулаймонийнинг ўлдирилиши оқибатида олтин ва нефть нархи кескин кўтарилди, мамлакатда уч кунлик мотам эълон қилинди.