Президент Шавкат Мирзиёев томонидан 2019 йил 10 апрель куни имзоланган «Ўзбекистон Республикасида фавқулодда вазиятларнинг олдини олиш ва бартараф этиш, ёнғин хавфсизлигини таъминлашнинг сифатли янгича тизимини татбиқ этиш тўғрисида»ги фармон ҳамда «Фавқулодда вазиятлар тузилмаларининг фаолиятини янада такомиллаштириш бўйича ташкилий чора-тадбирлари тўғрисида»ги қарорга мувофиқ, 2019 йилнинг май ойида Ички ишлар вазирлиги (ИИВ) Ёнғин хавфсизлиги бош бошқармаси (ЁХББ) ва унинг ҳудудий бўлинмалари Фавқулодда вазиятлар вазирлиги (ФВВ) тизимга ўтказилган эди.
Сўнгги вақтларда ёнғин хавфсизлиги соҳасида хизмат қилаётган ходимларнинг ФВВ тизимида ишни давом эттириши бўйича турли муаммолар юзага келаётгани хусусида ижтимоий тармоқлар ва ОАВда хабарлар эълон қилинмоқда. Ушбу масалага ойдинлик киритиш мақсадида «Дарё» мухбири Мусулмонбек Иброҳимов ИИВ Кадрлар бош бошқармаси бўлим бошлиғи Фарид Абдиев билан суҳбатлашди.
— Фарид ака, ёнғин хавфсизлиги ходимлари 2019 йил май ойида ФВВ тизимга ўтказилган бўлса-да, бир қатор муаммолар борлиги кўринмоқда. Шунга ойдинлик кирицангиз, асосий масала нимада?— Президентимизнинг 2019 йил 10 апрелдаги фармонига асосан, ИИВ тасарруфида бўлган ёнғин хавфсизлиги бўлинмалари, Ёнғин хавфсизлиги институти ФВВ таркибига ўтказилди. Фармон талабларидан келиб чиқиб, ИИВ буйруғи имзоланган. Бунга асосан моддий-товар бойликлари, бинолар топширилди. Ходимларнинг шахсий таркибини ўтказиш бўйича ҳам ички ишлар вазиринииг меъёрий буйруғи имзоланди. Президент фармони ва қарори талабларидан келиб чиқиб, 2019 йил 11 май куни ёнғин хавфсизлиги хизматининг ўша вақтда ишлаб турган барча ходимлари ИИВ тасарруфидан ФВВ ихтиёрига юборилган.
Ҳақиқатан ҳам ушбу масала юзасидан ёнғин хавфсизлиги хизмати ходимлари томонидан ижтимоий тармоқларда чиқишлар ва ўзимизга ҳам кўплаб мурожаатлар бўлмоқда. Ҳозирги кунда ИИВда Ёнғин хавфсизлиги хизмати тугатилган, яъни бу хизмат бизнинг вазирликда йўқ. Ёнғин хавфсизли хизмати ходимлари ФВВ тасарруфида хизмат олиб бормоқда. Ходимлар қарор талаблари билан танишган. Қарор талабларида 2020 йилнинг 1 январь кунидан ходимларнинг ҳарбий мақомга ўтиши белгиланган.
Асосий мурожаатлар ёнғин хавфсизлиги хизмати ходимларининг ИИВ тизимига қайтиб ишга олиш масаласида бўлмоқда. Аввалроқ, 2019 йил бошида Қўриқлаш хизмати ҳам ИИВдан Миллий гвардия тасарруфига ўтказилган эди. Ўшанда ҳам қўриқлаш хизматининг ички ишлар органларида хизматни давом эттириш истагидаги ходимларидан мурожаатлар бўлганди. Шу масалада ҳам ижтимоий тармоқларда турли тушунмовчиликлар бўлмоқда. Улар: «Қўриқлаш хизматидагилар ИИВда қолди-ю, нега биз (ёнғин хавфсизлиги хизмати ходимлари) ИИВда қололмаймиз?!», деган саволни қўймоқда.
Ходимлар шуни тушунишларини хоҳлардимки, ёнғин хавфсизлиги хизмати — бу алоҳида хизмат. Ушбу соҳа мутахассислари ёнғин хавфсизлиги бўйича ўқиган, амалиётни ҳам шу йўналишда олиб борган. ИИВда ёнғин хафсизлиги тугатилгандан кейин бу йўналишда бизда эҳтиёж қолмаган, мутахассиликлар бўйича лавозимларимиз ҳам йўқ.
Ҳозирги кунда бошқа вазирлик ва идоралардан эҳтиёжга қараб ишга қабул қилиш чоралари кўриб чиқилмоқда. Бугунги кунда шахсий таркиб сонидан келиб чиққанда 2 фоиздан кўпроқ бўш иш ўрнимиз бор. Бу жуда кам. ФВВдан ИИВга ўтмоқчи бўлиб мурожаат йўллаган шахслар алоҳида тартибда ўрганилмоқда. Лекин эҳтиёж ва бўш лавозимлар бўлмагани учун уларни ишга қабул қилишга имкониятимиз йўқ.
ИИВ Ёнғин хавфсизлиги хизмати ходимлари май ойида ФВВ тизимига ўтказилган бўлса-да, 2019 йил учун тасдиқланган бюджет асосида ойлик маош олиб келмоқда. Президентимизнинг ёнғин хавфсизлии хихзматини ФВВга ўтказиш бўйича қабул қилган қарорларига кўра, пул масалаларини тартибга солиш мақсадида 2020 йил 1 январдан хизмат ходимлари билан ФВВ шартнома тузилиши белгиланган. Бу билан шаҳодатланган ходимларга ҳарбий хизматчи мақоми берилади, ойлик маошлари ҳам шунга мослаштирилади. Менимча, ФВВнинг масъул ходимлари хизмат ходимларини шартнома тузилиши бўйича огоҳлантирган, шунда тушунмовчилик келиб чиққан.
Ёнғин хавфсизлиги хизмати ходимларининг ФВВ тизимига ўтган вақтида ҳеч қандай ҳақ-ҳуқуқлари бузилмаган — ўша иш, ўш лавозим билан ишлаб келишмоқда. Фақат уларга раҳбарлик қилувчи вазирлик ўзгарган, холос.
— Балки мурожаатларда ҳам жон бордир? Уларнинг асосий муаммоси нимада эканлиги аниқлаш мақсадида якка тартибда ҳам суҳбат олиб борилганми?— Бизда ҳар бир мурожаат алоҳида ўрганилади, керак бўлса аризачи билан якка тартибда суҳбат ўтказилади. Худди шу тартибда ФВВдан ИИВга ўтмоқчи бўлган ходимлар билан ҳам якка тартибда суҳбат ўтказилиб, тушунтириш ишлари олиб борилган. ФВВнинг масъул ходимлари ҳам мурожаат тушган ҳар бир туман ва шаҳарга бориб, ходимлар билан тушунтириш ишларини ўтказганидан хабаримиз ҳам бор.
Биз ариза билан чиққан ёнғин хавфсизлиги хизмати ходимлари билан суҳбат вақтида ФВВдан ИИВга нима учун ўтмоқчилиги ҳақида сўраганимизда, аниқ сабаблари кўрсатилган жавоб ололмаганмиз. «Биз шу соҳага қизиқамиз, шу соҳани танлаб ишга кирганмиз», «имконият беринглар, шу соҳада ишни давом эттирмоқчимиз» ёки «яқинларим, отам шу соҳада ишлаган, отамнинг ишини давом эттирмоқчиман», деганга ўхшаш умумий гаплар айтилади. Лекин уларга қандайдир тазйиқ ўтказилгани ёки ҳақ-ҳуқулари бузилгани, имтиёзлари камайтирилганлиги ҳақида мурожаат келиб тушмаган.
— 1 январдан ФВВ тизимига ўтказилган Ёнғин хавфсизлиги хизмати ходимлари билан шартнома тузишда қонун бузилиш ҳолатлари қайд этиладиган бўлса, улар қай тартибда мурожаат қилишлари керак?— Уларга ҳарбий мақом берилгани учун, уларнинг мурожаатлари билан асосан Ҳарбий прокуратура шуғулланади. Агар қонун бузилиши ҳолатлари юз берадиган бўлса, ўрнатилган тартибда Ҳарбий прокуратурага ёки юқори турувчи раҳбариятга мурожаат қилишлари мумкин.
Менимча, бундай ҳолат бўлмайди. Чунки яқинда ушбу масала юзасидан ўтказилган йиғилишда қатнашдик. ФВВ ёнғин хавфсизлиги хизмати ходимлари билан шартнома имзолашга даъват этилаётгани айтилди. Сабаби, уларга ҳам ходим керак. Хизмат ишини давом эттириш вазифаси уларга юклатилган.
Изоҳ (0)