24 декабрь куни Сенат Кенгашининг умумий овқатланиш корхоналари ва таълим тизимида аҳолининг санитария-эпидемиологик осойишталигига оид қонун ҳужжатларининг ижросини ўрганиш натижалари муҳокамасига бағишланган кенгайтирилган мажлиси бўлиб ўтган, бироқ мазкур тадбирга ёзма равишда таклиф этилганига қарамай соғлиқни сақлаш вазири Алишер Шодмонов унда иштирок этмаган эди.
Сенат ахборот хизматининг хабар беришича, шу муносабат билан Вазирлар Маҳкамаси томонидан соғлиқни сақлаш вазири Алишер Шодмоновнинг Сенат Кенгаши кенгайтирилган мажлисида иштирок этмаганлиги ҳолати ўрганиб чиқилган.
«Соғлиқни сақлаш вазирига вазирликда ижро интизоми тизимли йўлга қўйилмаганлиги ҳамда Сенатнинг мурожаатига масъулиятсизлик билан ёндашилганлиги кўрсатиб ўтилди. Вазирликнинг ижро интизоми бузилишига йўл қўйган масъул ходимларига нисбатан интизомий чоралар кўрилди», — дейилади расмий ахборотда.
Эслатиб ўтамиз, Ўзбекистон Сенати Кенгашининг 24 декабрь куни бўлиб ўтган кенгайтирилган йиғилишида Сенат раиси Танзила Норбоева умумий овқатланиш корхоналари ва таълим тизимида Соғлиқни сақлаш вазирлигининг аҳоли санитария-эпидемиологик осойишталигини сақлаш бўйича ишлари сезилмаётгани ҳақида гапирган ҳамда Соғлиқни сақлаш вазири Алишер Шодмоновга қўштирноқ ичида салом йўллаган эди.
25 декабрь куни Алишер Шодмонов Норбоеванинг саломига жавоб йўллаб, Сенат мажлисига таклиф қилинмагани учун бормаганини айтган эди.
Изоҳ (0)