Қашқадарё ҳокими вазифасини бажарувчи Зоир Мирзаев 31 декабрь куни вилоятнинг Деҳқонобод туманидаги бозор муаммосини воқеа жойига бориб ўрганди, дея хабар бермоқда Деҳқонобод туман ҳокимлиги ахборот хизмати. Аввалроқ тумандаги бозор муаммоси ҳақида «Дарё»да мақола эълон қилинган эди.
Мавзуга доир: «Одам ёллаб тадбиркорни туролмайдиган қилиб калтаклаш буюрилди». Деҳқонободда тадбиркорлар ўртасида можаро келиб чиқди
«10 йилдан ортиқ вақт давомида бозорга эгалик қилган тадбиркор бирор бир иш қилмаган. На савдогарларга ва на харидорларга шароит яратган. Бозорни ўз ҳолича ташлаб қўйиб, хароба ҳолга келтирган», – деди Зоир Мирзаев «Турсунхон Бибизулайҳо деҳқон озиқ-овқат бозори» фаолияти билан танишар экан.
Вилоят раҳбари бозор ичкариси ва мол бозорининг аҳволини кўздан кечираркан, бундай бозор бугунги Қашқадарё учун уятли ҳолат эканлигини таъкидлаган. «Мол бозори ва озиқ-овқат бозорининг бир-бирига яқин жойлашиши мумкин эмас, уларнинг орасида камида 150 метр масофа бўлиши керак», — деб айтган Мирзаев.
Вилоят раҳбари «Бойқўрғон беклиги деҳқон озиқ-овқат бозори» фаолиятидан ҳам қониқмаган, қурилиши якунланмаган бу бозор талабга жавоб бермаслигини таъкидлаган. Ҳоким оқсоқолларнинг фикрини эшитгач, ҳар иккала бозор фаолиятини тўхтатиб, «Турсунхон Бибизулайҳо деҳқон озиқ-овқат бозори» ўрнидан янги бозор қуришни таклиф қилган.
«Бозор учун янги жой қурилади, қурилиш учун барча қурилиш материалларини биз берамиз. Бозорни эса қишлоқ оқсоқоллари ҳашар йўли билан қуради — ўзлари ваъда беришди. Янги бозор қурилиши тугагач, бозорқўмликка беш нафар номзод қўямиз ва ишни эплайдиган тадбиркорга берамиз», — деб айтган Зоир Мирзаев.
Маълумотларга кўра, янги бозор қурилиши битгунга қадар ҳар душанба куни бўладиган бозор «Бойқўрғон беклиги деҳқон озиқ-овқат бозори»да давом этади.
Изоҳ (0)