27 декабрь куни Ўзбекистоннинг Вашингтон шаҳридаги элчихонасида АҚШда инглиз тилида илк бор нашр этилган Абдулла Қодирийнинг «Bygone days» («Ўткан кунлар») китоби тақдимоти бўлиб ўтди. Бу ҳақда ТИВ матбуот хизмати хабар берди.
Роман америкалик олим, АҚШ ҳарбий денгиз академияси Минтақавий тадқиқотлар марказининг собиқ директори Марк Риз томонидан таржима қилинган. У Ўзбекистондаги Тинчлик корпусининг илк кўнгиллиларидан бири бўлиб, 1994—1996 йилларда кўнгилли сифатида ишлаган.
Романнинг таржимаси устида ишлаш ўн беш йилдан кўпроқ давом этди. Элчихона АҚШдаги ватандошларнинг, шунингдек, ўзбекистонлик мутахассисларнинг фаол қўллаб-қувватлаши натижасида романни нашр этиш жараёни сезиларли даражада тезлашди. Китоб сотувга чиқди ва «беш юлдузли» рейтингга эга.
Китобнинг 660 саҳифасида муаллиф томонидан ишлатилган турли атамалар ва сўз ибораларининг 400 дан ортиқ изоҳлари, шунингдек, ўзбек халқининг маданияти, урф-одати ва анъаналари ҳақида тушунтиришлар мавжуд.
Тақдимотни очар экан, Ўзбекистон элчиси Жавлон Ваҳобов мамлакат раҳбарияти томонидан буюк аждодлар хотирасини абадийлаштириш, ўзбек романчилигининг асосчиси, «жадидлар» ҳаракатининг ёрқин вакили, ёзувчи Абдулла Қодирий таваллудининг 125 йиллигини мамлакатда кенг нишонлаш бўйича кўрилаётган чора-тадбирлар тўғрисида батафсил маълумот берди.
Марк Риз Ўзбекистонда ўтказган йиллари ҳақида ўзининг яхши хотиралари билан ўртоқлашди, ўз иши натижалари ҳақида сўзлаб берди ва барчани «ҳеч бўлмаганда бир марта Ўзбекистонга ташриф буюриб, унинг бой тарихий мероси, бетакрор меъморчилиги ва олийжаноб халқига гувоҳ бўлишга» чақирди.
«Анъанавий ўзбек мактабида ўқитувчи сифатида ўтказган вақтим бутун ҳаётимни ниҳоятда бойитган саёҳат бўлди. Абдулла Қодирийнинг Ўрта Осиё ва жаҳон адабиётида ўхшаши йўқ «Ўткан кунлар» романини инглиз тилига таржима қилиш мен учун шараф бўлди», – деди Марк Риз.
Ўзбекистон элчихонасининг маълум қилишича, китобнинг таржима нусхалари АҚШ ҳукумати расмийлари, дипломатик корпус вакиллари, АҚШнинг етакчи университетлари орасида тарқатилди. Шунингдек, роман АҚШнинг энг катта кутубхонаси ва энг қадимий федерал маданий муассасаси — Конгресс кутубхонасида рўйхатдан ўтказилди.
Тақдимот якунида Марк Риз билан «Bygone days» («Ўткан кунлари») китобининг 2020 йил баҳорида инглизча таржимадаги тақдимотини ташкил этиш, шунингдек, Абдулла Қодирийнинг «Меҳробдан чаён» романини таржима қилиш лойиҳасини муҳокама қилиш тўғрисида келишувга эришилди.
Изоҳ (0)