Ўзбекистон фуқароси Ақтўбеда юз берган ЙТҲ оқибатида ҳалок бўлди

«Ақтўбе—Мартук—Оренбург» автомобиль йўлида бир нечта автомобиль иштирокида йўл-транспорт ҳодисаси юз берди, деб хабар берди «КазАвтоЖол».

Фожиа 29 декабрь куни соат тахминан 14:30 да Ақтўбе шаҳридан 30 километр узоқликда юз берди.

Йўл-транспорт ҳодисаси 2 та Lada Largus ва BМW иштирокида юз берди.

Қайд этилишича, Largus Ақтўбе шаҳрига томон кетаётганида йўлнинг қарама-қарши томонига чиқиб кетган ва BМW билан юзма-юз тўқнашган.

Lada йўл четидаги ариққа отилиб кетиб, бироздан сўнг ёна бошлаган. Машина тўлиқ ёниб кетган.

Lada’да Ўзбекистон фуқаролари кетаётган эди. Улар автомобилдан чиқишга улгурган.  Фуқаролардан бири олинган тан жароҳатлари оқибатида шифохонада вафот этган. Яна 4 нафар Ўзбекистон фуқароси касалхонада қолмоқда.

BМWда эса Туркия фуқаролари кетаётган бўлган.

Яна бир Lada Largus автомобили эса Россия чегараси томон кетаётган эди. Унда ҳам Ўзбекистон фуқаролари бўлган. У зарбдан қочишга уриниб, рулни буриб юборган ҳамда BМWни уриб йўл четига чиқиб кетган.

Қайд этилишича, иккинчи Lada Largus автомобили йўловчилари жароҳатланмаган, уларга тиббий ёрдам кўрсатишга эҳтиёж бўлмаган.

ЙТҲ иштирокчиларининг барчаси эркаклар эканлиги айтилмоқда.