Qozog‘iston ichki ishlar vaziri Yerlan Turgumbayev Bek Air samolyotining falokatga uchrashiga sabab bo‘lgan versiyalar o‘rganilayotganini ma’lum qildi, deb xabar beradi Tengrinews.
“Hozirda IIV tergov guruhi Olmaotada sodir bo‘lgan aviahalokat bo‘yicha surishtiruv ishlarini olib bormoqda. Ayni vaqtda uchta versiya ko‘rib chiqilyapti. Birinchisi, ekipajning xatosi. Ikkinchisi, bortning texnik nosoz bo‘lganligi. Uchinchisi, navigatsiya xizmatining ishi”, — deydi IIV rahbari.
Ta’kidlanishicha, hozirda voqea joyini ko‘zdan kechirish va havo laynerini demontaj qilish ishlari olib borilmoqda. Shundan so‘ng samolyot aeroport hududiga olib borilib, u yerda batafsil tekshiruvdan o‘tkaziladi.
Bek Air aviakompaniyasining samolyoti 27-dekabr kuni Qozog‘iston mahalliy vaqti bilan tonggi soat 7 da halokatga uchragan. Layner bortida besh nafar ekipaj a’zosi, 93 nafar yo‘lovchi, jumladan, 89 nafar Qozog‘iston fuqarolari, ikki nafar Ukraina, bir nafar Qirg‘iziston va bir nafar Xitoy fuqarosi bo‘lgan. O‘zbekiston tashqi ishlar vazirligi halok bo‘lganlar orasida o‘zbekistonliklar yo‘qligini bildirgan. Aviahalokat oqibatida 15 nafar odam, xususan, samolyot komandiri halok bo‘ldi. Rasmiy manbalar aviahalokat qurbonlari sonining 12 nafar ekanini ma’lum qilgan. Olmaotadagi turli tibbiyot muassasalariga jami 49 nafar odam yotqizilgan. Shavkat Mirziyoyev Olmaotadagi aviahalokat munosabati bilan Qozog‘iston prezidentiga ta’ziya bildirgan.
Izoh (0)