«Дарё» интернет нашрига Деҳқонобод туманидаги бозорлардан бирининг ачинарли аҳволи акс этган видео келиб тушди. Видео муаллифининг ёзишича, мазкур бозор туманнинг Бойқўрғон қишлоғидаги «Турсунхон Бибизулайҳо деҳқон (озиқ-овқат) бозори» масъулияти чекланган жамиятига қарашли бўлиб, ҳар душанба куни бўлиб ўтади.
Видеодан англашилишича, бозорда савдо қилмоқчи бўлган савдогарлар икки ҳафтадан бери санитария талабларига жавоб бермайдиган ҳудудда савдо қилишга мажбур бўлган.
Видеотасвирдаги савдогарларнинг шикоят қилишича, савдо қилиш учун ажратилган жой талабга жавоб бермайди.
Тадбиркорлардан бири «Тепага чиқайлик, баланд, кенг жой. Топ-тоза қилиб қўйибди, деса. Яна бири 20 йилдан бери бозор қилган масъуллар бирор бир шароит яратмаганидан нолийди. Яна бир савдогар эса «Пулни, чекни олишни билган одам ҳамма жойни топа-тоза қилиб шароит яратмайдими?», дейди.
Маълум бўлишича, Бойқўрғон қишлоғидаги «Турсунхон Бибизулайҳо деҳқон (озиқ-овқат) бозори» МЧЖга қарашли бозор 2007 йил ташкил этилган бўлиб, 2019 йил июль ойига қадар фаолият юритган. Ўтган 12 йил давомида бозорда бирорта қурилиш ёки таъмирлаш ишлари олиб борилмаган.
«Турсунхон Бибизулайҳо деҳқон (озиқ-овқат) бозори» МЧЖ масъули Ҳамдам Маҳмудовнинг айтишича, 2019 йил июль ойидан туман ҳокими фармойишига мувофиқ «Бойқўрғон беклиги деҳқон бозори» МЧЖ ташкил этилган ва унинг раҳбарлигидаги бозор фаолияти тўхтатилган. Аммо бозор масъуллари бундан хабардор қилинмаган.
— Вилоятнинг собиқ ҳокими Зафар Рўзиев вазиятни ўргангач, мол бозорини юритиш учун бизга рухсат берди, озиқ-овқат бозорга эса «Бойқўрғон беклиги» масъуллари эга чиқиши кераклигини айтди, — дейди Ҳамдам Маҳмудов. — Аммо улар келишувга амал қилмади. Мол бозорини юритишда давом этди. Боз устига олти ой бизни сарсон қилди.
Деҳқонобод туман ҳокимлиги масъулларининг таъкидлашича, Ҳамдам Маҳмудов 2019 йил июнь ойидаги туман ҳокими фармойишидан норози бўлиб, Президент виртуал қабулхонасига мурожаат йўллаган.
Қашқадарё ҳокими ўринбосари Ўткир Бўтаевнинг мурожаатга жавобан йўллаган хатидан маълум бўлишича, «Турсунхон Бибизулайҳо деҳқон озиқ-овқат бозори» МЧЖ Ўзбекистон Республикаси Президентининг 2017 йил 27 мартдаги «2017—2019 йиллар даврида деҳқон бозорларни реконструкция қилиш ва уларнинг ҳудудида замонавий савдо мажмуалари қуриш дастурини тасдиқлаш ва уларнинг ҳудудида замонавий савдо мажмуалари қуриш дастурини тасдиқлаш тўғрисида»ги қарори ҳамда Вазирлар Маҳкамасининг 2012 йил 28 августдаги қарорлари талабларига мос келмайди. Шунингдек, бозор фаолияти талабга жавоб бермаслиги ҳақида туман ДСЭНМ, туман фавқулодда вазиятлар бўлими хулоса берган. Туман солиқ инспекцияси эса бозор раҳбарияти тушумлар режасини бажармай келаётгани ҳақида маълумот киритган. Туман ҳокими Зоир Алиқулов эса мазкур хулосаларга таяниб, бозорни ёпиш ҳақида қарор қилган ва янги бозор ташкил этган. Бироқ туман прокурори Лазиз Ҳамраев бозорни ёпиш ҳақидаги ҳоким фармойишига протест киритади. Натижада ҳоким фармойиши ўзгартирилиб, «Турсунхон Бибизулайҳо деҳқон озиқ-овқат бозори» МЧЖга бозордаги камчиликларни бартараф этиш учун ўн кунлик муддат берилади. Вилоят ишчи гуруҳи томонидан 2019 йил 27 ноябрь куни ҳолат ўрганилганда камчиликлар ҳалигача бартараф этилмагани аниқланади.
— 2019 йил июль ойидан эътиборан қонуний тартибда фаолиятимизни давом эттираётгандик, — дейди «Бойқўрғон беклиги деҳқон бозори» раҳбари Бекзод Бердиев. – Шу пайтга қадар савдогарлар учун барча шарт-шароитни яратдик. Энди эса эски бозор эгалари зўравонлик билан бизнинг бозоримизга ўтаётган савдогарлар йўлини тўсиб, талабга жавоб бермайдиган харобада савдо қилишга мажбурлашяпти.
Бекзод Бердиевнинг маълумот беришича, қишлоқ аҳли учун бозор бўлиб ўтадиган кун — душанба куни «Турсунхон Бибизулайҳо деҳқон (озиқ-овқат) бозори» МЧЖ масъуллари туман марказидан келаётган савдогарлар йўлини тўсиб, янги ташкил этилган бозорга ўтишига йўл қўймаган. Оқибатда ўртада келишмовчилик келиб чиққан. Ўзаро жанжал бир-бирига қўл кўтаришгача борган.
— Икки ҳафтадан буён эски бозор эгалари бизни уруш учун, одам ёллаяпти, — дейди Бекзод Бердиев. – Ўтган ҳафта бозор бўладиган кун менинг йўқлигимдан фойдаланиб, одам ёллаб ака-укаларимни роса уришган. Бу ҳафта ҳам мактаб ўқувчиларини ёллаб, бизнинг таъзиримизни бермоқчи бўлишди.
«Дарё» мухбирига тақдим этилган видеоёзувда ўзини мактаб ўқувчилари дея таништирган А. ҳамда Б. исмли ўқувчилар 500 минг сўм эвазига ёлланганини, кўрсатилган одамни туролмайдиган даражада калтаклаш буюрилганини айтади.
— Кўрсатилган одамни туролмайдиган қилиб урасизлар, эвазига 500 минг сўм пул берамиз дейишди, — дейди А.Ў.
А. ҳамда Б. исмли ёлланганларнинг маълумот беришича, уларни Шаҳбоз исмли ҳайдовчи бозор ҳудудига олиб келган. Буюртмачилар билан кўришгач, уларга кимни уруши лозимлиги ҳақида топшириқ берган. Ҳайдовчи эса Damas русумли автомобилининг давлат рақамини ечиб олиб, давлат рақамисиз ҳаракатланган. Ёлланган мактаб ўқувчилари кўрсатилган одамни калтаклаб, воқеа жойидан қочиб кетган. Аммо туман ИИБ ходимлари ҳаракати билан қўлга олинган.
Деҳқонобод туман ИИБ терговчиси Алишер Носировнинг «Дарё» мухбирига маълумот беришича, дастлабки ҳолат — «Бойқўрғон беклиги деҳқон бозори» масъулларининг калтакланиши ва уларнинг ҳам бунга жавобан иккинчи томонга қўл кўтариш ҳолати бўйича Жиноят кодексининг 109-модда 2-қисми билан жиноят иши қўзғатилган. Аммо мактаб ўқувчиларининг ёллангани ҳақида ҳали бир тўхтамга келинмаган. Тергов-суриштирув жараёни давом этмоқда.
Вазиятни ўрганган вилоят ишчи гуруҳи нафақат эски бозорни, балки ҳоким фармойишига кўра янги ташкил этилган «Бойқўрғон беклиги» деҳқон бозорини ҳам ўрганиб, бозор атрофи девор билан ўралгани аммо савдо-сотиқ учун шароит яратилмаганини билдирган. Шунингдек, мол бозори хусусий мактабгача таълим муассасаси билан бир девор оралиқда жойлашганини қайд этган. Ишчи гуруҳ «Бойқўрғон беклиги» бозори масъулларига боғча ёнидаги мол бозорини бузишни, ўрнига автотураргоҳ қуришни тавсия қилган бўлса, «Турсунхон Бибизулайҳо деҳқон озиқ-овқат бозори» МЧЖ га эса янги мол бозор қуриш бўйича тегишли кўрсатма берган.
Деҳқонобод туман ҳокимлиги ахборот хизматининг «Дарё»га маълумот беришича, ҳолат бўйича 2019 йил 21 декабрь куни туман ҳокими Зоир Алиқулов томонидан иқтисодий ишлар бўйича Қашқадарё вилоят судига даъво ариза киритилган. Даъво аризада жавобгарлар — «Турсунхон Бибизулайҳо деҳқон (озиқ-овқат) бозори» МЧЖ масъулларига мол бозор учун муносиб шарт-шароит яратиш, «Бойқўрғон беклиги деҳқон бозори» МЧЖ учун озиқ-овқат бозорида муносиб шарт-шароит яратиш ва мол бозорини тугатиб, ўрнида автотургоҳ қуриш масъулиятини юклаш сўралган.
Изоҳ (0)