Forbes журнали сўнгги 10 йилликда энг кўп даромад олган машҳурлар рейтингини эълон қилди, деб хабар бермоқда Meduza.
Унга кўра, мусиқачилар рўйхатида биринчи ўринни рэпер Dr Dre эгаллади. Унинг 10 йиллик даромади 950 миллион долларга баҳоланмоқда. Сўнгги альбоми 2015 йилда чиққан мусиқачи Beats наушниклари ишлаб чиқарувчи компаниянинг 20 фоиз акцияларига эгалик қилади.
Кучли учталикдан, шунингдек, қўшиқчи Тейлор Свифт (825 миллион доллар) ва Бейонсе (685 миллион) ўрин олган. Кейинги ўринларни U2 гуруҳи, рэпер Дидди, Элтон Жон, Жей Зи, Пол Маккартни, Кэти Перри ва Леди Гага эгаллаган.
Энг сердаромад спортчилар рейтингида эса боксчи Флойд Мейвезер етакчилик қилди. Forbes унинг бойлигини 915 миллион долларга баҳолаган. Ундан кейинги ўринларни футболчилар Криштиану Роналду (800 миллион доллар) ва Лионель Месси (750 миллион доллар) эгаллади. Рейтингдан, шунингдек, баскетболчи Леброн Жеймс, теннисчи Рожер Федерер, гольфчи Тайгер Вудс ва Фил Микелсон, боксчи Мэнни Пакьяо, баскетболчи Кевин Дюрант ва Formula-1 пойгачиси Льюис Ҳэмилтон жой олган.
Изоҳ (0)