Энг кўп ҳақ олувчи аёл қўшиқчи маълум қилинди

Forbes журналининг версиясига кўра, америкалик қўшиқчи Тейлор Свифт ўтган йил давомида дунёда энг кўп даромад кўрган қўшиқчилар рейтингида биринчиликни эгаллади, деб хабар беради «Korrespondent.net».

Сўнгги йил давомида Свифт 185 миллион доллар ишлаб топган. Асосий даромадини Reputation Stadium Tour номли халқаро турне келтирган. Биргина АҚШнинг ўзида қўшиқчининг концертига чипталар 266 миллион долларга сотилган.

Бундан ташқари қўшиқчи Republic Records овоз ёзиш студияси билан ҳам шартнома имзолаган бўлиб, ўзининг янги Lover альбоми савдосидан катта даромад кўриши кутилмоқда.

Рўйхатнинг иккинчи поғонасидан 81 миллион доллар билан Бейонсе жой олган. Учинчи ўрин эса йил давомида 62 миллион доллар ишлаб топган Рианнага насиб этди.

Ундан кейинги поғоналарни Кетти Перри (57,5 млн. доллар), Пинк (57 млн. доллар), Ариана Гранде (48 млн. доллар), Женнифер Лопес (43 млн. доллар), Леди Гага (39,5 млн. доллар), Селин Дион (37,5 млн. доллар) ва Шакира (35 млн. доллар).

Таъкидланишича, энг кўп даромад кўрган қўшиқчилар ўнталиги 2019 йилда 645,5 миллион доллар ишлаб топган, бу ўтган йилгига нисбатан 28,5 фоизга кўп демакдир.