Бразилия президенти Жаир Болсонару ўз қароргоҳи — Алворад қасрида йиқилиб тушганидан сўнг мамлакат жануби-ғарбидаги ҳарбий госпиталга ётқизилди, деб хабар берди «РИА Новости».
«Норасмий маълумотларга кўра президент ўз қароргоҳидаги ваннахонада йиқилиб тушган», — дейилади хабарда.
Қайд этилишича, президент шифокорлар кўригидан ўтган. Улар президентни касалхонага ётқизиш ҳақида қарор қабул қилган. Унинг мияси томография текширувидан ўтказилганида ўзгариш қайд этилмаган, бироқ Болсанару 6—12 соат давомида шифокорлар назорати остида бўлади.
Бразилия президентига ҳамроҳлик қилаётган хавфсизлик вазири Аугусту Хелену «президентнинг аҳволи яхшилигини, бироқ у тунни шифохонада ўтказиши»ни айтган.
Бразилия президентининг саломатлиги 2018 йилда унга пичоқ билан ҳужум қилишганларидан сўнг аҳолида ташвиш уйғотмоқда. Ушбу ҳужумдан сўнг Болсанару тўрт марта операция қилинган эди.
Декабрь ойи бошида Бразилия президенти тери саратонига чалинганликда гумонланиб, тиббий текширувдан ўтказилган эди. Текширув натижасида Болсанаруда саратон аниқланмаган.
Изоҳ (0)