Фуқароларни ўзини ўзи бошқариш органлари фаолиятини мувофиқлаштириш бўйича Республика кенгаши бошқаруви раиси Шавкат Жавлонов партиялар сайловолди дастурларида маҳалла институтига тааллуқли жиддий ғояларни илгари сурмаганини билдирди. У бу ҳақда 22 декабрь куни Марказий сайлов комиссиясининг Халқаро матбуот марказидаги ҳисоботидан сўнг «Дарё» мухбири Мусулмонбек Иброҳимовга берган интервьюсида таъкидлаб ўтди.
«Бешала партиянинг бўлиб ўтган дебатлари, ОАВлардаги чиқишлари ва сайловолди дастурларида маҳалла тўғрисида ва бу тизимни ривожлантиришга қаратилган фикрлар, таклиф ва ташаббуслар мавжудилигини учратмадим. Фақатгина Халқ демократик партиясининг маҳаллаларга яқинроқ позициясини англаган бўлсам-да, аммо бошқа партиялардан маҳалла фуқаролар йиғинлари тизими бўйича бирор гап эшитганим йўқ.Ташкилотимизга оид қонун бугунги давр талабларига мос келмаганлиги боис, тегишли идора ва амалиётчиларимиз билан 78 моддадан иборат янги таҳрирдаги қонун лойиҳасини ишлаб чиқдик ҳамда Қонунчилик палатасига киритдик. Янги сайланган депутатларимиз бизнинг тизим бўйича қабул қилинадиган мана шу қонунни, ҳеч бўлмаса ишлаб чиқишида, биринчилардан бўлиб ўз фикрларини билдиришади, деган умиддаман.
Янги парламент янгича йўналишлар билан Ўзбекистоннинг янада тараққий этишида хизмат қилади, деган ниятдаман», — деди Шавкат Жавлонов.
Изоҳ (0)