Фуқароларнинг сайлов ҳуқуқлари бузилиши билан боғлиқ мурожаатларни тезкор кўриб чиқиш ва уларни қонуний ҳал қилиш мақсадида бош прокурор ўринбосари Светлана Ортиқова бошчилигида штаб ташкил этилган. Ҳудудларда ҳам шахсан вилоят прокурорлари раҳбарлигида штаблар тузилган. Бу ҳақда Ўзбекистон бош прокурори Ниғматилла Йўлдошев маълум қилди, дея хабар бермоқда «Дарё» мухбири.
«Тошкент вақти билан 14:00 гача сайловчилар ва номзодлардан жами 65 та шикоят келиб тушди. Вилоятлар кесимида энг кўп — 24 та мурожаат Сурхондарё вилоятига тўғри келмоқда. Мурожаатларнинг 21 таси фуқаролар, 9 таси сайловда қатнашаётган номзодлар, 35 таси эса Марказий сайлов комиссиясига тегишли.
12 та мурожаатда Олий Мажлис Қонунчилик палатаси, 53 тасида эса халқ депутатлари маҳаллий Кенгашларига ўтказилаётган сайловларга боғлиқ масалалар ёритилган. Шикоятларнинг 56 фоизида сиёсий партиялар томонидан муайян шахсларнинг номзод сифатида кўрсатилмаганлиги, бунинг оқибатида улар сайловда қатанаша олмаганлиги қайд этилган.
Қонунчиликка кўра, депутатликка номзодларни илгари суриш партияларнинг мутлақ ваколати ҳисобланади. Прокуратура органларининг сиёсий жараёнга аралашиши мумкин эмас. Бундай ҳолатда қонун талабига асосан, фуқаро сиёсий партияга мурожаат қилиши ёки унинг қарори устидан бевосита судга шикоят бериши мумкин», — деди Ниғматилла Йўлдошев.
Изоҳ (0)