Олий Мажлис Қонунчилик палатаси ва маҳаллий кенгашлар депутатлари сайловида 13:00 ҳолатига кўра 7 миллион 971 минг 252 сайловчи ёки жами сайловчиларнинг 42,4 фоизи овоз бериб бўлди. Бу ҳақда Марказий сайлов комиссияси котиби Худоёр Маматов маълум қилди. 15:00 ҳолатига кўра, 18,7 миллиондан зиёд сайловчиларнинг 58,3 фоизи ёки 10,9 миллиондан ортиғи овоз бериб бўлган.
«Бу — жорий сайловларни бўлиб ўтган деб ҳисоблаш мумкин, дегани ва мен, фурсатдан фойдаланиб, сялов жараёни иштирокчиларини, халқимизни ушбу воқеа билан табриклайман», — деди у.
Сайлов кодексига мувофиқ, агар сайловда сайловчилар рўйхатига киритилган сайловчиларнинг 33 фоизидан ками иштирок этган бўлса, ўтмаган деб топилади.
Худоёр Маматов айрим сайлов участкаларида қоидабузарликларга йўл қўйилаётгани, хусусан, айрим фуқаролар бошқа оила аъзолари номидан овоз бергани ҳолатлари ҳақида хабарлар борлигини таъкидлаб ўтди.
Аввалроқ ички ишлар вазири Пўлат Бобожонов Фарғона вилоятининг Қува туманида ноқонуний ташқивот ҳолати қайд этилганини маълум қилган эди — депутатликка номзодлардан бирининг қариндоши номзоднинг сурати туширилган фотосуратни машинасига ёпиштириб олган. Бу ҳақдаги ахборот прокуратурага берилган. «Gazeta.uz»нинг ёзишича, шу каби шикоят халқ депутатлари Чирчиқ шаҳар кенгашига кўрсатилган номзод устидан ҳам тушган.
Изоҳ (0)