Тошкент шаҳрида жойлашган талабалар турар жойлари 22 декабрда бўлиб ўтадиган сайловлар муносабати билан хавфсизликни таъминлаш мақсадида 21 декабрь куни ёпилади. Бу ҳақда Олий ва ўрта-махсус таълим вазирлиги хабар берди.
Олий таълим муассасалари талабалари, академик лицей ҳамда профессионал таълим муассасалари ўқувчилари 2019 йил 20 декабрдан 2020 йил 6 январгача қишки таътилга чиқади.
Вазирликнинг қайд этишича, қишки таътил муддати талабаларга конституциявий ҳуқуқларидан фойдаланган ҳолда 2019 йилнинг 22 декабрида бўлиб ўтадиган Ўзбекистон Республикаси Олий Мажлиси, халқ депутатлари вилоят, туман ва шаҳар Кенгашларига умумхалқ сайловларида иштирок этиши учун ўзгартирилди.Бундан кўзланган мақсад талаба-ёшлар ўзлари яшаб турган ҳудуддан туриб сайловларда иштирок этиши ҳамда узлуксиз дам олишлари учун имконият яратишдир.
Таъкидланишича, Тошкент шаҳридаги талабалар турар жойларида 89 мингдан зиёд талаба истиқомат қилади. Муҳим сиёсий тадбирга тайёргарлик кўриш ва хавфсизлик нуқтаи назаридан 2019 йил 21 декабрь куни барча талабалар турар жойлари ёпилади.
Бунда гуруҳ раҳбарлари талабалар турар жойида истиқомат қиладиган ҳар бир талаба билан мулоқотда бўлган ҳолда уларнинг қишки таътилни мазмунли ўтказишларида кўмаклашади, дейилади вазирлик хабарида.
Вазирликнинг маълум қилишича, Янги йил ва сайлов муносабати билан авиа ва темир йўл чипталарига талабнинг ортиши ҳамда бошқа узрли сабабларга кўра доимий яшаш манзилига кетишга кечикадиган талабаларга шароит яратилади.
Вазирликнинг таъкидлашича, талабалар турар жойидан ҳеч ким сабабсиз чиқариб юборилмайди.
Изоҳ (0)