Вазирлар Маҳкамасининг 2019 йил 25 ноябрдаги «Умумий фойдаланиладиган транспортда йўловчи ташишда йўлкира ҳақини тўлашнинг автоматлаштирилган тизимини жорий этиш тўғрисида»ги қарорига асосан Тошкент шаҳри жамоат транспортида 2020 йилнинг 1 январидан йўл ҳақини тўлашнинг автоматлашган тизими жорий қилиниши ҳақида хабар берилган эди. Тошкент шаҳар ҳокимлиги мазкур тизим қандай тартибда йўлга қўйилиши ҳақида маълумот берди.
Жамоат транспортини автоматлаштирилган тизимга ўтказиш қандай амалга оширилади?
2020 йил 1 январдан Тошкент шаҳридаги жамоат транспортида йўловчи ташишда йўл ҳақини тўлашнинг автоматлаштирилган тизими жорий этилади. Мазкур тадбир босқичма-босқич амалга оширилиши режалаштирилган.
2019 йил декабрь ойи охирида метрополитен кассалари ва «Тошшаҳартрансхизмат» АЖ савдо шохобчаларида ҳамда Алоқабанк филиалларида транспорт карталари сотилиши бошланади.
«Тошшаҳартрансхизмат» АЖ автоматлаштирилган тизимга ўтишга тайёрми?
Янги тўлов тизимини йўлга қўйиш ишлари BPC billet group халқаро холдинг компанияси ҳамда «Ягона умумреспублика процессинг маркази» МЧЖ билан ҳамкорликда олиб борилмоқда. Айни пайтда ушбу компаниянинг Россиядаги филиали мутахассислари «Тошшаҳартрансхизмат» АЖ тасарруфидаги автобус саройларининг ҳайдовчи ва чиптачилари ҳамда ғазначиларига ўқув-машғулотларини ўтказмоқда. Уларда иштирокчиларга электрон тўлов амалиёти, жамоат транспортига валидаторни қандай ўрнатиш ва улардан фойдаланиш тартиб-қоидалари, янги йўл карталарининг афзаллиги ва бошқа мавзуга оид кўникмалар ўргатилмоқда.
Таъкидланишича, биринчи босқичда Тошкент шаҳрида ҳаракатланаётган 200 та автобусга стационар валидатор ўрнатилади. Қолганларида эса чиптачилар қўлида мобиль валидатор бўлади.
Тўлов қандай амалга оширилади?
Ушбу тизим доирасида жамоат транспорти учун ягона транспорт карталари, тўловни амалга ошириш имконини берадиган мобиль илова ҳамда бир марталик QR чипталар жорий этилади. Мазкур карталарни савдо нуқталари, метрополитен, автовокзал, темир йўл кассалари ва аэропортлардан сотиб олиш мумкин бўлади.
Шунингдек, мазкур тизимда йўл ҳақи учун тўловларни контактсиз банк карталари (Humo, Uzcard, Mastercard, Viza ва бошқалар) орқали амалга ошириш имконияти яратилади.
Ягона транспорт карталарини банк пластик карталаридаги маблағлар, банкоматлар, киоскалар, тўлдириш терминаллари ҳамда мобиль иловалар орқали тўлдириш мумкин бўлади.
Қайд этилишича, янги тизимнинг йўлга қўйилиши натижасида йўл ҳақидан келадиган тушумлар миқдори 15—25 фоизга кўпаяди, ташувчи корхоналарнинг даромадлари ошиши орқали ҳаракат таркибини тизимли янгилашга шароит яратилади. Шунингдек, йўналиш тизимларини мақбуллаштириш ва самарали режалаштириш учун технологик асослар яратилади.
Изоҳ (0)