Юнусободдаги метро қурилишида олтинчи қурбон тупроқ остидан олиб чиқилди

Тошкент метрополитени «Юнусобод» йўлининг янги қурилаётган қисмида 18 декабрь куни фавқулодда вазият вужудга келган эди. Фавқулодда вазиятлар вазирлигидан хабар беришларича, воқеа жойида олиб борилган тезкор қидирув-қутқарув ишлари натижасида 18 декабрь ва 19 декабрь кунлари олти нафар фуқаронинг жасади тупроқ остидан олиб чиқилди ва уларнинг шахсига аниқлик киритилди:

• 1989 йилда туғилган, Қашқадарё вилояти Шаҳрисабз тумани Бешкапа қишлоғида истиқомат қилган фуқаро Абдуллаев Ойбек Тўра ўғли;
• 1989 йилда туғилган, Қашқадарё вилояти Шаҳрисабз тумани Бешкапа қишлоғида истиқомат қилган фуқаро Равшанов Жонибек Ислом ўғли;
• 1999 йилда туғилган, Қашқадарё вилояти Шаҳрисабз тумани Бешкапа қишлоғида истиқомат қилган фуқаро Абдуллаев Давронбек Ботирович;
• 1986 йилда туғилган, Қашқадарё вилояти Яккабоғ туманида истиқомат қилган фуқаро Диёров Анвар Нормуродович;
• 1996 йилда туғилган, Самарқанд вилояти Оқдарё тумани Фармонобод қишлоғида истиқомат қилган фуқаро Раҳматов Ихтиёр Амриддин ўғли;
• 1981 йилда туғилган, Самарқанд вилояти Пастдарғом туманида истиқомат қилган фуқаро Каримов Зариф Тўлқинович.

«Ҳукумат комиссияси томонидан жабрланганлар ва уларнинг оила аъзоларига барча зарур моддий ва маънавий ёрдам кўрсатиш чоралари кўрилмоқда. Вазирлик раҳбарияти ва барча шахсий таркиби номидан ҳодиса оқибатида қурбон бўлган фуқароларнинг оила аъзоларига чуқур ҳамдардлик билдирилади», — дейилади ФВВ ахборотида.